+22 °С
Ямғыр
Яңылыҡтар таҫмаһы
2 Июнь 2021, 10:30
Төркиәгә ҡапҡа асылманы әлегә...
Рәсәй 10 июндән Австрия, Венгрия, Ливан, Люксембург, Маврикий, Марокко, Хорватия, Албанияға чартер осоштарын тергеҙә. Шулай уҡ Белоруссия, Греция, Әзербайжан, Әрмәнстан, Катар, Үзбәкстан, Мысыр, Сербияға рейстарҙы арттыра. Әммә Төркиә курорттарына һауа юлы һаман ябыҡ ҡала. Беләһегеҙ, осоштар 15 апрелдән 1 июнгәсә тыйылғайны. Сикләүҙәр 1-енән һуң да ғәмәлдә. Уның ҡарауы, үҙебеҙҙә "туристик кешбэк" эшләй.
Яҡынса фараздар буйынса рәсәйҙәр Төркиәгә 21 июндән һуң китә ала. Барыһы ла пандемияға бәйле. Әгәр ҙә коронавирус (Рәсәйҙә түгел, ә Төркиәлә) таралыу ҡурҡыныс булмаҫлыҡ хәлгә еткәнсе кәмеһә, туристарға юл асыласаҡ. Бәлки, 1 июлдән һуң булыр.
Рәсәй туроператорҙары ассоциацияһынан белдереүҙәренсә, 2 – 21 июнь арауығында Төркиәгә беҙҙән 262 мең кеше (иң ҙур алты туорператор һатҡан) барып ҡайтырға тейеш булған. Йәғни тур һатып алған. Йәнә лә 10 меңгә тиклем кеше бәләкәйерәк компанияларҙа тур бронләүе ихтимал. Әгәр 15 апрелдән 21 июнгә тиклем осорға тейеш булған кешеләрҙе һанаһаҡ, улар 795 меңгә етә.
Әйткәндәй
Үҙебеҙҙә лә шәп кенә итеп ял итеп була. Етмәһә, “туристик кешбэк” программаһы эшләй. Тәүге этабында турҙар 17 мартта һатыла башлағайны. Уның буйынса сәйәхәткә 30 июнгә тиклем сығырға мөмкин (һатыу 15 июнгәсә). Икенсе этабы тиҙҙән башланасаҡ. Йәғни турҙарҙы октябрь-декабрь айҙарына һатып алырға була. Кешбэк талаптары шундай: Рәсәй буйлап сәйәхәт итергә, 2 төндән дә (ҡунаҡханала ҡалыу) кәм булмаған турҙы “Мир” картаһы менән түләргә.
