+21 °С
Болотло
Яңылыҡтар таҫмаһы
29 Май 2021, 06:03
Өфөлә Евразия китапханаһы төҙөләсәк
Был хаҡта республика Башлығы Радий Хәбиров «XXI быуат яҙыусыһы» төбәк-ара форумында белдерҙе.
«XXI быуат яҙыусыһы» төбәк-ара форумының икенсе көнөндә Башҡортостан Башлығы Радий Хәбиров яҙыусылар менән осрашты. Ул үҙ сығышында тәҡдимдәре менән уртаҡлашты:
– Башҡорт әҙәбиәте донъя кимәлендә танылыу алырға тейеш. Ошо маҡсатта тәржемә өлкәһен йәнләндерергә кәрәк, был эшкә республика ҡаҙнаһынан өс миллион грант бүлеү ҡарала. Өфө үҙәгендә ҡәләм оҫталарын бер майҙанда туплаусы урын барлыҡҡа киләсәк. Пушкин урамындағы күҙ ауырыуҙары ғилми-тикшеренеү институтының алтынсы йыл буш торған ике ҡатлы бинаһын республика ҡарамағына күсереп, мәҙәни үҙәккә әйләндерәсәкбеҙ. Унда әҙәби салон асыу, «Китап» нәшриәте йортоноң экпозицияһын булдырыу планлаштырыла. Шулай уҡ Евразия китапханаһы төҙөләсәк, уның яҡынса проекты әҙер, тышҡы яҡтан тирмәне хәтерләтә. Китапхана Хөкүмәт йорто һәм республика һуғыш ветерандары госпитале араһында төҙөләсәк, ҡалаға инеп барған күперҙән үк күренеп торасаҡ.
Башҡортостан Башлығының был тәҡдимдәре көслө алҡыштар менән ҡабул ителде.
Республика етәксеһе әйтеүенсә, Хөкүмәт кимәлендә ижад кешеләренә адреслы ярҙам күрһәтеү мөмкинлектәре лә барлана. «Китап» нәшриәтенә өҫтәмә финанс ярҙам күрһәтеләсәк. Яҙыусыларға гонорарҙар артасаҡ.
Форум барышында уңышлы пьесалар яҙыу, әҙәби тәнҡитте шымартыу, балалар әҙәбиәтен үҫтереүгә бәйле фекер алышыу майҙансыҡтары, оҫталыҡ дәрестәре лә үтте. Төп иғтибар һәләтле йәштәр тәрбиәләүгә йүнәлтеләсәк.
