“Өләсәйҙә ҡунаҡта”

Стәрлебаш районынының Ямғырса ауылында үҙенсәлекле туристик маршрут ойошторолған. Бында ҡунаҡтар “Өләсәйҙә ҡунаҡта” була ала.

Тәүҙә туристар район үҙәгендәге тыуған яҡты өйрәнеү музейында, Ижад йортонда була. Әйткәндәй, бында уларға кейеҙ баҫыу буйынса оҫталыҡ дәрестәре ойошторолған. Киләһе маршрут – ауыл йортона. Ләлә Файыҡованың йортона хатта “Өләсәйҙә ҡунаҡта” тигән баннер ҙа ҡуйылған. Уңған хужабикә ҡунаҡтарҙы милли ризыҡтар менән – ауыл ҡатығы, ҡаймаҡ, һөҙмә, бал менән һыйлай, бауырһаҡ бешереү буйынса оҫталыҡ дәрестәре күрһәтә. Мотлаҡ үлән ҡушылған сәй эсерә. Уны ла оҫта хужабикә үҙе үҫтергән үләндәрҙе, киптереп әҙерләй.