+21 °С
Болотло
Яңылыҡтар таҫмаһы
3 Апрель 2021, 16:32
«Мираҫ»тар Ғәрәп Әмирлектәрен гөрләтәсәк
Бөгөн Ғәрәп Әмирлектәренең Шарджа ҡалаһында «Мираҫ көндәре» фестивале старт алды.
Ул 10 апрелгә ҡәҙәр дауам итәсәк.
Фестивалдең географияһы киң — Рәсәй, Ҡаҙағстан, Беларусь, Черногория, Һиндостан, Испания, Төньяҡ Македония, Болгария, Ливан, Ираҡ, Сүриә, Тажикстан, Йемен Республикаһы һәм башҡа ил вәкилдәре ҡатнашыуы көтөлә. «Мираҫ» ансамбле Рәсәй данын яҡлаясаҡ. Ансамбль Берләшкән Ғәрәп Әмирлектәренә башҡорт, рус бейеүҙәрен һәм музыкаль композициялар алып бара.
Халыҡ-ара күләмле сарала ансамбль солистары Юлай Ҡасимов һәм Зәлиә Ғиниәтуллина ла сығыш яһаясаҡ. СIOFF фестивалдәренең иң төп шарты – бөтә сығыштар ҙа тере музыка оҙатыуында башҡарылырға тейеш. Шуға ла ансамбль менән бергә оркестр ҙа сәфәргә юллана.
«Беҙ Рәсәйҙә пандемиянан һуң сит илгә гастролгә сыҡҡан тәүге коллектив. Был фестивалгә күберәк башҡорт бейеүҙәрен алдыҡ. Үҙебеҙҙең мәҙәниәтебеҙҙе мөмкин тиклем юғары кимәлдә күрһәтергә тырышасаҡбыҙ», — ти «Мираҫ» солисы, БР-ҙың атҡаҙанған артисы Марат Солтанов.
«Мираҫ»тарға уңышлы сәфәр теләйек!
Фото: БР мәҙәниәте порталы.
