«Беҙ үҙебеҙ – башҡорттар»

Мифтахетдин Аҡмулла исемендәге Башҡорт дәүләт педагогия университетында шәп проект тормошҡа ашырыла – «Беҙ үҙебеҙ – башҡорттар» фәнни-мәғрифәт интернет-платформаһы эшләй башланы. Кисә башҡорт гәзит-журналдарының баш мөхәррирҙәре, ғалимдар, уҡытыусылар, йәмәғәтселек вәкилдәре әлеге проект менән танышты, Ҡаҙағстан, Ҡырғыҙстан, Үзбәкстандан ҡәрҙәштәребеҙ менән аралашты.

Сара БДПУ ректоры Салауат Тәлғәт улы Сәғитовтың һәм Граждандар йәмғиәтенә булышлыҡ итеү фонды етәксеһе Люциә Юлыеваның сәләмләү һүҙе менән башланды. Артабан вуз уҡытыусылары һәм хеҙмәткәрҙәренең беренсел профсоюз ойошмаһы етәксеһе Закирә Бәҙретдин ҡыҙы Латыпова ҡорҙа ҡатнашыусыларҙы проект менән таныштырҙы. «Беҙ үҙебеҙ – башҡорттар» фәнни-мәғрифәт интернет-платформаһы – башҡорт телен, мәҙәниәт һәм матбуғатын үҫтереүгә һәм һаҡлауға йүнәлтелгән проект. Платформала төрлө курс, оҫталыҡ дәрестәре һәм тренингтар уҙғарыла, мәҙәниәт, әҙәбиәт буйынса файҙалы мәғлүмәттәр бирелә. «Бында Уралдың көсөн, Ватандың дәртен, тыуған ерҙең моңон тойоп үҫкән, ләкин яҙмыш ҡушыуы буйынса төрлө тарафтарҙа йәшәгән милләттәштәребеҙ хаҡында бай мәғлүмәт, халҡыбыҙ тарихы, мәҙәниәте, әҙәбиәте һәм бөгөнгөһө хаҡында рухлы яҙмалар һеҙҙе йәлеп итер. Тап ошо платформа бер-беребеҙ менән тура ҡарап, юғары маҡсаттарға ынтылырға ярҙам итеүсе бер аҙым булыр», – тип белдерә проект менеджеры Закирә Бәҙретдин ҡыҙы.

Түңәрәк өҫтәлдә төп башҡорт баҫмаларының етәкселәре менән бер рәттән гәзитебеҙҙең баш мөхәррире Артур Хәсән улы Дәүләтбәков та сығыш яһаны. Ул «Йәшлек»тең йәмғиәттә тотҡан урыны, эшмәкәрлеге хаҡында һөйләне. БДПУ студенттарын гәзит менән хеҙмәттәшлек итергә, әүҙемерәк булырға саҡырҙы.

Әлбиттә, башҡорт рухиәтенең төп терәге – ул гәзит-журналдар, әлеге проект беҙҙең матбуғат баҫмалары менән хеҙмәттәшлек итәсәк, сит илдә йәшәүсе милләттәштәребеҙ менән тоташтырыусы «күпер» булып торасаҡ.

https://bez-bashkorttar.ru/

Фото: Т. Аманов.