Эшҡыуарлыҡҡа илткән юлдар ҡатмарлы йәки Аҡбур һатып та аҡса табырға мөмкин

Рәшит мәктәп йылдарынан уҡ сәләмәт тормош алып бара, һәр ерҙә әүҙем була. Ауыл ерендә эш тауыҡ сүпләһә лә бөтмәҫ тигәндәй, кескәй генә сағынан ҡул аҫтына инеп, йорт ҡураны нығытыу, бесән хәстәрләү кеүек эштәрҙе үҙ иңендә татый. Уҡыуҙа ла, спортта ла һынатмаған егет тиҙерәк мәктәпте тамамлап, Өфөнө яуларға тигән маҡсат ҡуя. Шул ниәте уны БДУ ның журналистика бүлегенә алып килә лә инде. Тырыш егет ҙур ҡалала юғалып ҡалмай, университет, йәш яҡташтар берлеге сараларында әүҙем ҡатнаша. Юғары курстарҙа «Һаҡмар» район гәзитендә, Башҡортостан юлдаш телевидениеһында, «Юлдаш» радиоһында практика үтә. Башҡаларҙан айырылып торған, тырыш, йүнсел Рәшитте күрмәй ҡалмайҙар, университетты тамамлау менән уны телевидениеның яңылыҡтар бүлегенә эшкә саҡыралар. «Һәр ваҡыт хәрәкәттә булыу, тынғыһыҙ эш миңә оҡшаны, ҙур тәжрибә алдым», – тип һөйләй ул был хаҡта.

Тап шул осорҙа йәш яҡташтар берлегенең осрашыуҙарының береһендә Рәшит һөйгән йәрен – БДМУ ла уҡып йөрөгән Әбйәлил ҡыҙы Гөлназды тап итә. Йәштәр оҙаҡҡа һуҙмай, сәстәрен сәскә

бәйләй. Ғаилә ҡорғандан һуң Рәшиттең эшҡыуарлыҡҡа илткән оҙайлы юлы башлана. Үҙ иңенә икеләтә яуаплылыҡ алған егет үҙ эшен асып, тормошто алға ебәреү, ғаиләне етеш донъяла йәшәтеү тураһында уйлана. «Тәүге йылдарҙа ставканың дүрттән бер өлөшөнә генә эшләнем, ярты йыл самаһы үткәс кенә яҡшы эш хаҡы алыуға өлгәштем. Әммә эшемдә артабан үҫешеү өсөн мөмкинлектәр юҡ ине. Алдан төрлө идея менән янып йөрөнөм. Минеңсә, кеше ирекле булырға тейеш. Теләйһең икән, ауылға атай әсәй янына ҡайтып кил, теләһәң, балыҡҡа бар. Әммә бының өсөн эшләү кимәлең дә юғары булырға тейеш», – ти Рәшит.

2014 йылда дәүләт эшенән китә һәм, туғандары менән кәңәш төңәш итеп, ҙур бизнесҡа тотонорға була. Йәнә төрлө өлкәне ҡапшап ҡарай: тәүҙә крәҫтиән фермер хужалығы аса, урман эштәре менән булыша, кейем һалым менән һатыу итә, унан парикмахер салоны, туңдырма киосктары аса. Хоҙай үҙенең яратҡан ҡолдарын һынар тигәндәй, геройыма был осорҙа нимә генә кисерергә тура килмәй. Үҙе йыйған хәләл аҡсаһын юҡҡа сығарһындармы, партнерҙары кәкре ҡайынға терәтеп китһенме, бурҙар туңдырма нөктәһен талаһынмы... Эшҡыуар төрлө һынау аша үтә. Рәшит бер осорҙа журналистикаға кире ҡайтып, «Аманат» республика үҫмерҙәр журналында эшләп ала. Әммә төрлө уңышһыҙлыҡҡа тарығандан һуң да бизнесҡа тотоноу уйынан кире ҡайтмаған була. Киләһе эшен ул уйлабыраҡ, ябайыраҡ өлкәнән башлай. Тормош иптәше менән аҡбур һатыу буйынса онлайн бизнес асып ебәрә. «Бизнес йәмғиәттең, кешеләрҙең ниндәйҙер проблемаһын хәл итергә тейеш. Мәҫәлән, ҡатыным йөклө сағында аҡбур ашаны, ниндәйҙер витамин етмәгән, күрәһең. Шулай итеп, хәләл ефетем ошо эшкә тотоноп китте. Мин уға ярҙам итеп ебәрҙем. Тәүге осорҙа кешегә нимә менән шөғөлләнеүебеҙҙе әйтергә уңайһыҙланып та йөрөнөм», – ти Рәшит. Бөгөн был бизнес өс балалы ғаиләгә мул тормошта йәшәргә мөмкинлек бирә икән, уның яҡшылығынан башҡаһы юҡтыр. Әле ярайһы һөҙөмтәләргә лә ирешкән улар. «Бизнес – бик ҡатмарлы донъя. Һәр аҙымыңды үлсәп баҫмаһаң, табышыңдан ҡолаҡ ҡағыуың да ихтимал. Ә бының