Владимир Путин: Беҙҙә “мәмерйә милләтселеге” булырға тейеш түгел

Владимир Путин бөгөн видеоконференция рәүешендә Рәсәй парламентының түбәнге палатаһында эшләүсе дүрт фракция етәкселеге менән осрашты.

Аныҡлабыраҡ әйткәндә, улар – “Берҙәм Рәсәй” партияһы рәйесе Сергей Неверов, ”Ғәҙел Рәсәй” етәксеһе Сергей Миронов, КПРФ рәйесе Геннадий Зюганов һәм ЛДПР башлығы Владимир Жириновский.

Путин менән һөйләшеүҙә шулай уҡ РФ Дәүләт Думаһы Рәйесе Вячеслав Володин менән Президент Хакимиәте Етәксеһенең беренсе урынбаҫары Сергей Кириенко ла булды.

Төрлө темалар күтәрелде. Һәр фракция етәксеһе үҙен (партияны) борсоған мәсьәләне күтәрҙе. Ә улар, йәғни, борсолдорған мәсьәләләр етерлек.

Беҙгә үҙенең “сағыу” тауышы менән таныш Жириновский әфәнденең сығышынан һуң, Президент илебеҙҙең һәр милләтен һаҡлауҙың мөһимлеген билдәләне.

– Рустар – Рәсәйҙе дәүләт булараҡ барлыҡҡа килтергән халыҡ. Улар, әлбиттә, төп нигеҙҙе тәшкил итә. Шул уҡ ваҡытта беҙҙә башҡа бик күп халыҡ йәшәй. Улар өсөн дә Рәсәй - Тыуған ил. “Россия для русских” тигән өндәмә рустарға зарар ғына бирә, – тине Путин. – Бындай позиция ”мәмерйә милләтселеге”нең сағылышы. Бының таралыуына юл ҡуйырға ярамай, – тип тә өҫтәне ил башлығы. – Һәр этнос вәкиле ярҙамды тойорға тейеш, шул иҫәптән рус халҡы ла. Шул саҡта ғына беҙҙең илебеҙ үҫәсәк. Әле бына һуңғы йылдарҙағы ҡаҙаныштарҙың береһе – күп милләтле халҡыбыҙҙың татыулығы. Тулыраҡ бында: http://kremlin.ru/events/president/news/65013.

Фото: Кремлин.ру