+22 °С
Ямғыр
Яңылыҡтар таҫмаһы
28 Ғинуар 2021, 08:34
Судҡа мөрәжәғәт итегеҙ
Бер көндө әсәйемә, урамда акция бара, бушлай матурлыҡ салонында битегеҙҙе таҙартып ҡайтығыҙ, тип сертификат биргәндәр, паспорт менән килергә ҡушҡандар. Ул ҡыуанып, барып күреп киләйем әле, тип сығып китте. Салондағы ҡыҙҙар битенә маскалар эшләп ҡайтарған да бит, өҫтәүенә, 100 мең һумлыҡ кредит алдыртып, бер сумаҙан крем биргәндәр. “Минең башымды ныҡ бутанылар, әллә ниндәй ҡағыҙҙарға ҡул ҡуйҙырҙылар. Бер нәмә лә аңламаным”, – тип ҡайтып инде ул. “Һин бит быларҙы 100 мең һумлыҡ кредитҡа алғанһың”, – тигәйнем, әсәйем аптырап китте. Бөгөн был матурлыҡ салонын беҙ судҡа бирҙек. Алданмаҫ өсөн нимә эшләргә? Әлиә.Стәрлетамаҡ ҡалаһы.
Мутлашыусылар үҙҙәренең компанияларына халыҡҡа матур вәғәҙәләр биреп, бушлай процедуралар үткәрәбеҙ, тип саҡыра. Кешеләр шундай нәмәләргә тиҙ ышана.
Һеҙҙең осраҡта “РФ Ҡулланыусылар хоҡуҡтарын яҡлау тураһында”ғы федераль законға таянып эш итергә кәрәк.
Килешеүҙең сәбәптәрен күрһәтеп, аҡсағыҙҙы кире ҡайтарыуҙы һорап, ике ғариза яҙырға. Ойошма юристары уларҙың берәүһен үҙҙәрендә ҡалдырып, икенсеһенә ҡабул итеү датаһын ҡуйып, һеҙгә ҡайтарырға тейеш. Әгәр ҙә аҡсағыҙҙы кире ҡайтарырға риза булһалар, кредит килешеүен ғәмәлдән сығарыу тураһында ике яҡлы килешеү төҙөлә. Клиника аҡсағыҙҙы банкҡа кире ҡайтарһа, финанс ойошмаһы алдында бурыслы булмауығыҙ тураһында белешмә алырға ла онотмағыҙ. Аҡсағыҙҙы кире ҡайтармаһалар, мутлашыу осрағы буйынса хоҡуҡ һаҡлау органдарына мөрәжәғәт итегеҙ, судҡа ғариза яҙығыҙ.
Фото: Т,Аманов
