Төбәктең сүп-сар полигондары тиҙҙән туласаҡ

Республиканың сүп-сар полигондары тулһа, нимә эшләйәсәктәрен министр былай тип аңлатты. Бөгөн төбәктә һигеҙ полигон тулып бара, киләһе өс йылда улар ябыласаҡ. Бөгөн ведомство был биләмәләрҙе рекультивациялау хаҡында һөйләшеүҙәр алып бара. Властәр тулған полигондар мәсьәләһенән сығыу юлын сүп-сарҙы айырым йыйып, уны артабан эшкәртеү инфраструктураһын үҫтереүҙә һәм яңы полигондар төҙөүҙә күрә.

Әлегә Дыуан районында яңы полигон төҙөлөшө тамамланыу өҫтөндә, Баймаҡ районында иһә сүп-сар урынын проектлау бара. Бынан тыш, Иглин районында ҡыйҙы сорттарға айырыу комплексы эшләй. Ошо арала Туймазы районында бындай комплекс сафҡа инәсәк. Киләһе өс йылда Балтас, Дәүләкән, Баймаҡ, Мәләүез райондарында яңы полигондар барлыҡҡа киләсәк. Төбәктең тәьмин итеү өсөн кәмендә ун полигон талап ителә, тине Урал Салауат улы.

Журналистарҙы төбәктәге законһыҙ рәүештә ҡаҙылма байлыҡтар табыу проблемаһы хаҡында ла һорашты. Министр әйтеүенсә, һуңғы ике йылда был мәсьәләне яйға һалыуға өлгәшкәндәр. 2020 йылда хоҡуҡ һаҡлау органдары һәм прокуратура менән 800 рейд ойошторолған, һөҙөмтәлә 155 закон боҙоу асыҡланған. Тәбиғәтте талаусылар 5,7 йәмғеһе миллион һумлыҡ штрафҡа тарттырылған. Ишембай һәм Өфө райондарында енәйәт эштәре асылған, муттар хөкөмгә тарттырылған. Бөгөн Баймаҡ, Йылайыр һәм Ишембай райондарында законһыҙ ҡаҙылма байлыҡ табыу буйынса дүрт факт тикшерелә.

2019 йылда ҡаҙылма байлыҡтар табыуҙың иҫәбен алыу һәм һатыу буйынса Берҙәм республика автоматлаштырылған мәғлүмәт системаһы булдырылды. Уның ярҙамында ҡаҙылма байлыҡ менән файҙаланыу өсөн һалым арттырылды.

Күптән түгел Белорет металлургия комбинатының шлам йыйыу быуаһынан Ағиҙелгә ағып сыҡҡан бысраҡ, төбәктәге күл-йылғаларҙа браконьер ауҙары, Талҡаҫ күленә тәбиғәт һәйкәле статусы биреү мәсьәләһенә ҡағылған һорауҙар яңғыраны.

Ғөмүмән, журналистар тәбиғәт парктары буйынса күп һорау бирҙе. Пандемия арҡаһында республикаға туристар ағымы, башҡа йылдар менән сағыштырғанда, өс тапҡырға артҡан. Был хәл был тәбиғәт парктарына оло көсөргәнеш төшөрҙө. Шуға күрә уларҙың инфраструктураһын яҡшыртыу буйынса быйыл эш алып барасаҡбыҙ, тине Урал Искәндәров.