Һаулыҡ һаҡлау системаһын модернизациялауға — 19,8 млрд һум

Был хаҡта оператив кәңәшмәлә республика Башлығы Радий Хәбиров хәбәр итте. Дөйөм алғанда программаның бюджеты 19,8 млрд һум тәшкил итәсәк. 2,8 млрд һумын республика бүлә.

Программа иң беренсе сиратта 50 меңдән әҙерәк кеше йәшәгән ауыл-ҡасабаларҙа беренсел ярҙам күрһәтеү сифатын күтәреүгә йүнәлтелә. Башҡортостанда 11 поликлиника, өс участка һәм бер район дауаханаһы, 21 дөйөм практика табибы офисы, 42 амбулатория һәм 456 фельдшер-акушер пункты төҙөү, ике поликлиниканы төҙөкләндереү планлаштырыла. Дүрт үҙәк һәм 11 участка дауаханаһын, 48 поликлиниканы, 20 амбулаторияны һәм ике ФАП-ты капиталь төҙөкләндереү көтә.

Шулай уҡ модернизация программаһына рентген, УЗИ һәм үпкәне яһалма тын алдырыу аппараттары, маммографтар, томографтар һәм башҡа медицина техникаһы алыу индерелгән. Был йүнәлештә дөйөм сығым 6,5 млрд һум тәшкил итәсәк. 800 млн һумға яҡын аҡсаны автомобилдәр һатып алыуға тотонасаҡтар.

2021 йылда беренсел звеноны модернизациялауға дөйөм алғанда 3,2 млрд һум аҡса тотоноласаҡ. 2,4 млрд һумы – биналарҙы төҙөү һәм капиталь төҙөкләндереүгә, 534 млн һумы – медицина техникаһы һатып алыуға, 86 млн һумы табиптарға автомобиль һатып алыуға йүнәлтеләсәк.

«Это очень большая и впечатляющая программа. Благодарю всех сотрудников нашего Минздрава за отличную заявочную кампанию. Теперь нужно всё запланированное реализовать. Финансирование – только половина успеха, нужно на должном уровне провести строительные работы, приобрести технику и оборудование. Будем работать», — тине Радий Хәбиров.