+21 °С
Болотло
Яңылыҡтар таҫмаһы
17 Октябрь 2020, 15:39
Өфөлә ике "полицейскийҙы" төрмәгә ябасаҡтар
Өфөнөң Октябрь районы судында бер нисә енәйәттә ғәйепләнгән ике полиция хеҙмәткәре хөкөм ителде.
2018 йылдың майында әлеге "полицейскийҙар", үҙҙәре фаразлауынса, наркотик матдәләр һатыу менән шөғөлләнгән кешеләрҙе тотҡан. Хоҡуҡ һаҡсылары уларға, әгәр ҙур күләмдә аҡса бирмәһәгеҙ, наркотик һатыуҙа ғәйепләйәсәкбеҙ, тип белдергән. Тотҡарланған дүрт кеше теге әҙәмдәргә 560 мең һум биргән. Бының өсөн уларҙың береһенә машинаһын ломбардҡа һалырға торорға тура килгән.
Һуңыраҡ шул уҡ йылда полиция хеҙмәткәрҙәренең береһе иптәше менән ялған авария теркәү менән шөғөлләнә башлаған. Һөҙөмтәлә енәйәтселәр страховкалау компанияһынан 145 мең һум аҡса алған. Шулай уҡ тикшереү барышында хоҡуҡ һаҡсыларының хәрби патрондарҙы урлауы асыҡланған.
Полиция хеҙмәткәрҙәрен эштән бушатҡандар. Улар үҙ ғәйебен танымаһа ла, суд ҡарарына ярашлы, 4,5 йылдан 10 йылға тиклем иркенән мәхрүм ителәсәктәр.
Шулай уҡ яңыраҡ Өфөлә автомобиль номерҙары менән сауҙа итеүсе тағы бер полиция хеҙмәткәрен төрмәгә яптылар.
Фото: Уфа1.
