+17 °С
Облачно
Яңылыҡтар таҫмаһы
30 Сентября 2020, 08:40
Михаил Горбачев: Әгәр ҙә СССР тарҡалмаһа...
Ҡасандыр Евразияла йәйрәп ятҡан ҙур илебеҙҙе өлкән быуын йыш ҡына һағынып иҫкә ала. Уны тарҡатыуҙа булышлыҡ итеүселәрҙе һүгә. Их, әгәр ҙә СССР булһа-а... Әйткәндәй, уның, "Үҙгәртеп ҡороу", "Гласность!" тип ҡысҡырған етәксеһе Михаил Горбачев та уйлана икән.
"Әгәр ҙә Советтар Союзын һаҡлап ҡалып булһа, донъябыҙ тотороҡлораҡ, хәүефһеҙерәк, ғәҙелерәк булыр ине", - тигән Горбачев әфәнде Британияның "The Times" баҫмаһына интервью биргәндә.
Булманы шул... СССР-ҙың экс-президенты шулайтып та өҫтәгән: "Илде тарҡатыу перестройканың һуңғы нөктәһе түгел ине. Беҙ былай булырын теләмәнек".
Горбачев үҙ сәйәсәтенең ыңғай яҡтарын да һанап киткән: "һалҡын һуғыш"тың туҡтауы, ядро ҡоралын кәметеү буйынса килешеү, һүҙ һәм дин азатлығы, илдән сығып йөрөүҙең ирекле булыуы, күп партиялылыҡ, альтернатив һайлауҙар.
Үткәндәргә бәйле уйланыу яҡшы ла. Тик ул илде кире ҡайтармаясаҡ. СССР - тарихта ҡалған ил. Бөгөнгө Рәсәй - ысынбарлыҡ. Ундағы тотороҡлолоҡто һаҡларға кәрәк. Хәүефһеҙ һәм ғәҙел донъя ҡайҙа икән ул?..
Фото: Википедия.
