Коронавирус менән сирлеләр ҡайһы район-ҡалаларҙа артҡан?

Башҡортостандың Һаулыҡ һаҡлау министрлығы коронавирус менән сирләү осраҡтары йышыраҡ күҙәтелгән райондар буйынса мәғлүмәтте яңыртты. Статистикаға яраҡлы, Өфө ҡалаһы сирлеләр һаны буйынса лидер булып ҡала. Бөгөнгө көнгә баш ҡалабыҙҙа коронавирус менән сирлеләр өс меңгә етеп бара – 2923.

Икенсе урында Нефтекама ҡалаһы. Бында барлығы 522 сирле теркәлгән. Артабан сирлеләр һаны буйынса тәүге урындарҙа Бәләбәй районы (325) һәм Стәрлетамаҡ ҡалаһы (311) килә. Тәүге “бишәү” исемлегендә шулай уҡ Туймазы районы – 306 сирле.

Һуңғы тәүлек эсендә республикала 34 кешегә COVID-19 диагнозы ҡуйылған. Республикала коронавирус менән сирләүселәр һаны 7469 кешегә етте. Шул иҫәптән Өфөлә – 19 кешегә, Туймазы районында – өс, Өфө, Шишмә райондарында һәм Октябрьский ҡалаһында – икешәр, Асҡын, Ишембай, Нуриман, Тәтешле, Учалы райондарында һәм Нефтекама ҡалаһында – берешәр кешегә артҡан.