Ҡалабыҙға шәп бүләк

Белеүегеҙсә, ошо ялда республикабыҙҙың баш ҡалаһы Өфө 450 йыллыҡ ҙур юбилейын билдәләй. Күптән килгән матур ғәҙәт буйынса, байрам ваҡытында күп кенә социаль-мәҙәни объекттар тантаналы асыла. Шундай мөһим объекттарҙың береһе – Көрәш һарайы. 
Хәтерегеҙҙә булһа, ул республикабыҙ Башлығы Радий Хәбировтың тәҡдиме менән 2019 йылдың авгусында төҙөлә башланы. Радий Фәрит улы бинаның нигеҙенә киләһе быуындарға мөрәжәғәт менән ваҡыт капсулаһы һалып ҡалдырҙы.

Спорт объектының дөйөм майҙаны 28 мең квадрат метр тәшкил итә.Унда 3400 тама­шасыға иҫәпләнгән амфитеатр менән уни­версаль зал, 18 келәмле биш залы булған спорт көрәше мәктәбе, спортсылар өсөн ҡунаҡхана, конференц-зал, медицина-тер­геҙеү үҙәге, спа-комплекс, бассейн урын­лашҡан. Эргәһендә футбол, баскетбол, во­лейбол, теннис менән шөғөлләнеү өсөн спорт майҙансыҡтары ла бар.
Көрәш һарайының директоры вазифаһын башҡарыусы Эдуард Абдядилов белде­ре­үенсә, бында ярыштарҙан тыш, юғары ки­мәлдәге концерттар ҙа үткәреү мөмкин буласаҡ.
Һарайға ингән төп ишектәр башында боронғо Греция атлеттарының барельеф­тары, уға Муса Гәрәев урамы яғынан ингән ерҙә көрәш мәлендә һынландырылған бил­дәле спортсыларҙың һындарынан скульпту­ра ансамбле ҡуйыла.
Быйыл июлдә Өфөгә эш визиты менән килгән Рәсәй хөкүмәте Рәйесе урынбаҫары Марат Хөснуллин көрәш һарайының иле­беҙҙә генә түгел, ә бөтә донъяла мөһим спорт ҡоролмаларының береһе буласағын бил­дәләне.
– һоҡланам. Был донъя кимәлендәге объект, тип иҫәпләйем. Уның концепцияһы һәм идеологияһы яҡшы.
Мине бигерәк тә уның үҙәктә түгел, ә тап үҫешә башлаған торлаҡ микрорайонында булыуы һөйөндөрҙө. Тимәк, ул районға кешеләрҙе ылыҡтырыу, архитектураны, мәҙәниәтте, ялды, спортты үҫтереү үҙәге буласаҡ.
Бик матур, лайыҡлы проект өсөн Радий Фәрит улын һәм уның командаһын, бөтә көрәшсене ҡотлайым.
Заманында үҙем дә көрәш менән шөғөл­ләндем. Шунлыҡтан тап ошондай проект­тарҙың тормошҡа ашырылыуын айырыуса хуплайым, – тип ул бик юғары баһа бирҙе. 
Ысынлап та, күп функциялы Көрәш һарайы Өфөнөң юбилейына шәп бүләк кенә түгел, ә халыҡ-ара һәм Рәсәй кимәлендәге ярыштарҙы үткәреү өсөн төп урындарҙың береһе буласаҡ.
Хәйер, уны һынарға күп ҡалманы: октябрҙә республикабыҙҙа «Рәсәй – спорт державаһы» халыҡ-ара спорт форумы һәм илебеҙ Президенты ҡарамағындағы Физик культураны һәм спортты үҫтереү буйынса совет ултырышы уҙасаҡ.