"Хеҙмәткә һәм оборонаға әҙер"ҙәр!

Әбйәлил районының Әбделмәмбәт дөйөм белем биреү мәктәбендә тырыш, әүҙем уҡыусылар белем ала. Йыл буйына район, республика, Бөтә Рәсәй күләмендә үткән конкурстарҙа, олимпиадаларҙа, ярыштарҙа ҡатнашалар, призлы урындар яулайҙар. Мәктәп директоры Илдар Ғибәҙәтов, уҡыу йылына йомғаҡ яһап, уҡыусыларҙы уңыштары менән тәбрикләгәндә "Шәп спортсы" номинацияһын яулаған Айваз Миндийәровты ла ҡотланы. Мәхмүт ауылында йәшәгән 14 йәшлек Айваз Миндийәров, ГТО ("Хеҙмәткә һәм оборонаға әҙер!") буйынса республика йыйылма командаһы ағзаһы булараҡ, былтыр республика намыҫын яҡлап "Артек"та ла булып ҡайтты. 

– Айваздың ошондай һөҙөм­тәләргә өлгәшеүенә физкультура уҡытыусыһы Фәизйән Тайсин күп көс һалды, – ти уҡы­тыусылары. – Ата-әсәһе­нең дә ҡанатландырып, дәрт­ләндереп тороуы – ҡыуаныс!
Бала сағынан спорт менән дуҫ булған Айваз ныҡышмал, етди холоҡло. Аҡыллы, көслө үҫмер яҡшы уҡый, мәктәп фәндәренән айырыуса математиканы үҙ итә. 
Шөкөр, уның кеүек шәп балалар һәм өлкәндәр өсөн республикала спорт менән шө­ғөлләнергә бөтә шарт та бар. Башҡортостан Башлығы Радий Хәбиров республикала "Хеҙ­мәткә һәм оборонаға әҙер!" комплексын үҫтереү өсөн өс йыл элек үк йөкләмә әҙерләргә ҡушҡайны. 2021 йылда уҡ ошо маҡсатҡа төбәк бюджетынан 21,7 миллион һум субсидия бүленеп, һәр муниципали­тет­ҡа 69 мобиль спорт ҡорамалы комплекты һатып алынды. 
– 2021 йылда Әбйәлил районында ГТО майҙансығы фай­ҙаланыуға тапшырылды, – тип һөйләй балалар-үҫмерҙәр спорт мәктәбе директоры Ласын Усманов. –  Спорт май­ҙансығы "Уңыш" стадионында урынлашҡан. Майҙансыҡта бөтәһе 26 урам тренажеры бар. Спорт объектында бер юлы 52 кеше  шөғөлләнә ала. Майҙан­сыҡҡа көнөнә уртаса 200 кеше килә, ул бер ҡасан да буш тормай. Районда 2017 йылдан алып 2024 йылдың беренсе кварталына тиклем ГТО АИС-ында бөтәһе 14949 кеше (ха­лыҡ иҫәбенән 37,52%) тер­кәлгән, шуларҙан 8067 кеше ГТО нормативтарын үтәүҙә ҡатнашҡан. Бөтәһе 6468 кеше “иң яҡшы” билдәһенә нор­мативтарҙы үтәгән. 2024 йыл­дың беренсе кварталы йом­ғаҡтары буйынса Әбйәлил районы республикала 17-се урынды биләй. Өлкән быуын кешеләре өсөн районда "ГТО 60+" фестивале үткәрелә, ә мәктәпкәсә йәштәге балалар өсөн "ГТОшка-крош­ка" фестивале уҙғарыла. Райондың сығарылыш уҡыусылары ГТО нормативтарын һы­нап ҡарауҙа әүҙем ҡат­наша, отчет осоронда 123 уҡыусы ГТО нормативтарын уңышлы үтәгән.
Иң кесе ҡатнашыу­сыларға алты йәш булһа, иң ололар – Рәүф Шөғөров (75 йәш) менән Клара Абдуллина (77 йәш). Фестивалдә йүгереү-һикереү буйынса тәү­ге рекордтарға ынтылған алты йәшлек балалар ҙа, республика намыҫын ил кимәлендә ла­йыҡ­лы яҡ­лаған Айваз кеүек үҫмерҙәр ҙә, ҡартлыҡҡа би­решмәй, йәштәр менән бер тигеҙ норматив­тарҙы үтәгән пенсионерҙар ҙа әүҙем, сәләмәт тормош алып барып, барыһына ла яҡшы өлгө күрһәтә. Ә һеҙ ГТО нормативтарын тапшырҙығыҙмы?

Башҡортостан Башлығы Радий Хәбиров республикала "Хеҙмәткә һәм оборонаға әҙер!" комплексын үҫтереү өсөн өс йыл элек үк йөкләмә әҙерләргә ҡуш­ҡайны. 2021 йылда уҡ ошо маҡ­сатҡа төбәк бюджетынан 21,7 миллион һум субсидия бүленеп, һәр муниципалитетҡа 69 мобиль спорт ҡорамалы комплекты һатып алынды. 

Б. ШӘРИПОВА.