Яңы миҙгелде – яңы өмөттәр менән

“Салауат Юлаев” командаһы тәүге осрашыуын Ҡаҙағстан боҙонда “Барыс” командаһы менән уҙғарҙы. Беҙҙекеләр ялдан дәртләнеп сыҡҡан, ахыры: уйындың тәүге минутында уҡ уҡтай дәғүәсе ҡапҡаһына ябырылды. Һөҙөм­тә оҙаҡ көттөрмәне – Александр Хмелевский тәүге шайбаны индереп тә ҡуйҙы.
Икенсе миҙгелде беҙҙекеләр күпсе­лектә башланы. Вячеслав Лещенко менән Михаил Науменков биргән пасты Владислав Ефремов һә тигәнсә ҡаҙаҡтарҙың ҡапҡаһына сойорғотто. Уйындың 45-се минутында Шмелев менән Хафизуллин биргән шайбаны Шаров та оҫта ғына Паскаленың ҡапҡаһына елләне.
Бөтәһе лә беҙ теләгәнсә барған кеүек ине лә... Хужалар һис тә өфө­ләргә бирешергә теләмәнеме әллә юлаевсылар, еңеү беҙҙә, тип тынысландымы, 3:0 иҫәбенә еңеп барғанда, “ҡаҙаҡтар” Гайтамиров менән Оберг ике тапҡыр өфөләрҙең ҡапҡаһын “сылатты”. Самонов һалҡын ҡанлы – бар көсөн һалып, иҫәпте тигеҙләргә бир­мәне. Уйын беҙҙең файҙаға – 3:2!
Тәүге осрашыуҙағы тәүге еңеү хок­кейсыларҙы ла, көйәрмәндәрҙе лә дәртләндерҙе. Шуға күрше Екатерин­бургтың “Автомобилист” командаһын беҙҙең егеттәр еңел генә еңер кеүек тойолғайны. Әлеге лә баяғы тәртип яғы был юлы ла аҡһаны. Әүҙем генә башланған уйын боҙолдо.
Владислав Ефремовтың Алексей Махеевты йығып, штраф эскәмйәһенә ултырыуы булды, Григорий Панин шайбаны яңылыш Анатолий Голышевҡа бирҙе. Ул инде бындай көтөл­мәгән “бүләк”те беҙҙең ҡап­ҡасыға бүләк итте. Урал егет­тәре был голдан һуң дәрт­ләнеберәк уйнарға тотондо. Беҙҙекеләр  әҙме-күпме уйын­ды тигеҙләне. Сергей Шмелев күпселекте файҙа­ланып, гол индерҙе. Михаил Науменков Степан Хрипуновты этеп, ярты минуттан Евгений Тимкин ме­нән штраф эскәмйәһенә эләк­те. Ҡапҡасы Александр Самонов менән боҙҙағы егеттәр хәл­дәренән килгәнсә тырышты. Күпселектә саҡта Хмелевский Алексей Пустозеровҡа биргән пасты уныһы файҙалана алманы. 
Өфөләр күпме генә алға бар­маһын, күршеләр уйын теҙгенен ныҡлы тотто. Өсөнсө миҙгел баш­ланғас, беҙҙекеләр йәнә яңылышты.  Панин борт янында көрәшкәндә ҡапҡабыҙ эргәһендәге Василевский Сергей Широковтағы шайбаны тартып алмай, китеүе булды, уныһы Голы­шевҡа пас биргәйне, икенсе шайбаны индереп, еңеүҙе беҙҙән тартып алды.
Екатеринбургтағы осрашыу, беҙҙе­келәр тырышыуға ҡарамаҫтан, 2:1 иҫәбенә тамамланды. Әлеге лә баяғы дисциплина аҡһауы арҡаһында күр­ше­ләр күпселектә иҫәпте асыуға өлгәште.
Уйын уртаһында дәғүәселәр боҙҙа өсәү генә ҡалғас, беҙҙекеләр иҫәпте тигеҙләне. Өсөнсө миҙгелдә иһә Широков менән Голышевтың оҫта ком­бинацияһы хужаларға еңеү килтерҙе.
6 сентябрҙә юлаевсылар ҡабат КХЛ-ға ҡайтҡан “Лада”ға ҡунаҡҡа барҙы. Бында ла Хмелевский һынатманы. Тәүге миҙгелдә ул Михаил Науменков биргән шайба менән иҫәпте асты. 
Икенсе миҙгелдә лә Саша иҫәпте арттырҙы. Өсөнсө миҙгелдә Трой Джозеф беҙҙең ҡапҡаны “асты”. Бер минут та үтмәне, йәнә Хмелевский Паниндың пасын оҫта файҙаланды.
Алексей Пустозеров – дүртенсе, Вячислав Лещенко бишенсе шайбаны индереп, иҫәпте 5:1-гә еткерҙе. Дәғүәсе еңел генә еңелергә теләмәне. Трой Джозеф уйын бөтөп килгәндә Жоков ҡапҡаһына икенсе шайбаһын ырғытты.
Афарин, юлаевсылар! Үҙебеҙҙең боҙҙа ла еңеүҙәр көтәбеҙ.
Башҡа командаларға килгәндә, күр­шеләрҙән Магнитогорскиҙың “Металлург”ы быйыл Гагарин кубогын яулаған ЦСКА-ны 4:2 иҫәбенә ҡый­ратты. Һөҙөмтәлә ул ике уйындағы өс очкоһы менән Көнсығыш кон­ферен­цияһының турнир таблица­һының – 3-сө, ә ЦСКА Көнбайыш конференцияһының һиге­ҙенсе баҫҡысында урынлашты.
СКА иһә “Лада”ла ҡунаҡта булып, уны 3:0 иҫәбенә еңде. Был – төньяҡ баш ҡала  клубының төп ваҡытта яулаған 500-сө еңеүе. Ошо уңышҡа өлгәшеү өсөн команда 864 матч үткәргән.

Ә. ХЫЗЫРОВА.