Төньяҡ Корея спортсылары Олимпияданан баш тартты

Төньяҡ Корея спортсылары коронавирус пандемияһын һәм үҙенә ҡарата сит ил вәкилдәренең яуыз ҡарашын күҙ уңында тотоп, оҙаҡламай Пекинда башланасаҡ Ҡышҡы Олимпия уйындарында ҡатнашмаҫҡа булды.

Улар уҙған Токиолағы Йәйге уйындарға ла бармай ҡала. Ғөмүмән, был ябыҡ ил, 1964 йылдан алып, Олимпия уйындарында көс һынаша башлай, әммә барыһында ла ҡатнашмай. Әйтәйек, ошо арауыҡта уҙған 18 Ҡышҡы уйындың туғыҙында ғына ярыша. Йәйгеһендә иһә, өс уйынға бармай ҡала. Спортсылары бөтәһе 56 миҙал яулай. Бигерәк тә Йәйге уйындарҙа 16 алтын, 15 көмөш һәм 23 бронзаға эйә була. Ә инде Ҡышҡыһында бары ике генә тапҡыр подиумға күтәрелә. 1964 йылда көмөш яулап, бынан 30 йыл элек өсөнсө урын яулап, уңышҡа өлгәшә.

Фото: ТАСС.