Бер алтын дүртенсе урынға күтәрҙе…

Германияла барған биатлон буйынса Донъя кубогының сираттағы ярышында спортсылар ҡатнаш эстафетала һәм сингл-микста көс һынашасаҡ.

Рәсәй биатлонсыларынан ҡатнаш эстафетала Максим Цветков, Александр Поварницын, Ирина Казакевич менән Валерия Васнецова ҡатнашһа, сингл-микста яҡташыбыҙ Антон Бабиков менән Кристина Резцова йүгерәсәк.

Кисәге спринт бәйгеһендә Александр Логинов юғары урынға күтәрелеп, команда өсөн тәүге алтын миҙал килтерҙе. Быға тиклем шәхси беренселектә, беҙҙекеләрҙән Эдуард Латипов ике «көмөш» һәм Кристина Резцова «бронза»лы булғайны.

Хәҙер Рәсәй командаһы ҡумтаһында бер алтын, өс көмөш һәм өс бронза миҙал бар һәм улар дүртенсе урынға күтәрелде. Ул йәһәттән, Норвегия спортсылары алдынғылыҡты бирмәй. Улар иҫәбендә – 9 алтын, 2 көмөш һәм 7 бронза миҙал. Швеция – 6 алтын, 3 көмөш, 5 бронза булһа, Франция иҫәбендә 4 алтын, 12 көмөш һәм 6 бронза миҙал.

Фото: ТАСС.