Йәштәр – илдең берҙәмлеге өсөн

Фестиваль дүрт тематик йүнә­леште берләштерҙе:
– «Аҫылташ» йәштәр форумы. Унда йәш яҡташтар берләш­мәләренең 300-ҙән ашыу вәкиле йыйылды;
– эшләүсе йәштәрҙең туристик слеты;
– студенттар советтары, студент ятаҡтарының профсоюздары ак­тивистарының туристик слеты;
– илебеҙҙең ҙур ҡалаларында белем алған Башҡортостан студенттары ҡатнашлығында «Бер­гә» йәштәр форумы. 
Бынан тыш, төрлө майҙансыҡта йәштәр үҙ белемен ка­мил­лаштырҙы, фекер алышты, тәжрибә тупланы һәм уртаҡ­лашты. “Росмолодежь. Гранты” майҙансығының эшләүе лә бик файҙалы булды. Егеттәр һәм ҡыҙҙар өсөн РФ Йәштәр эштәре буйынса агентлыҡтың грант яр­ҙамына проекттар конкурсы ойошторолдо.
Әйткәндәй, фестивалгә муни­ципалитеттарҙың йәштәр сә­йәсәте тармағында эшләүсе хеҙмәт­кәрҙәре йыйылғайны. Улар өсөн квалификацияны күтәреү буйынса семинар үтте.
БР Йәштәр сәйәсәте министры Вито Сабиров һүҙҙәренсә, һәр йүнәлеш буйынса ла лекциялар, оҫталыҡ дәрестәре программаһы бай йөкмәткеле булды.
Иң тулҡынландырғысы – “Һал­датҡа хат” акцияһы. Фестивалдә ҡатнашыусылар махсус хәрби операцияла бурысын үтәүсе яугир­ҙарыбыҙға теләк­тәшлек күрһәтеп, тыуған яҡ сәләмен юллап, хат яҙҙы.
“Илдең берҙәмлеге – берҙәмлек өсөн” сара­һының йәнә бер матур өлөшө иҫәбендә “Көс­лөләр уҙышы” менән ”Ҡымыҙ йолаһы” бар. Уҡтан атыу, халыҡ һәм өҫтәл уйындары, спорт ярыштары, милли музыка ҡорал­дарында уйнау буйынса оҫталыҡ дәрестәре тураһында әйтеп тороу ҙа артыҡ – был майҙансыҡтар гөжләп торҙо.
Кисен иһә республиканың бил­дәле сәхнә йондоҙҙары майҙан тотто.
Әйткәндәй, был берҙәмлек сараһы БР Башлығы гранттары фонды ярҙамында үткәрелде.

А. ЗИННУРОВА.

Фотолар – БР Йәштәр сәйәсәте министрлығының социаль сел­тәрҙәге төркөмөнән.