Бөтә яңылыҡтар
Йәмғиәт
25 Ноябрь , 14:49

Мәктәптә туҡланыу нисек үҙгәргән?

Балалар һаулығына ҡағылышлы бөтә нәмә кеүек үк, мәктәптә туҡланыу мәсьәләһе лә бик көнүҙәк.

Мәктәптә туҡланыу нисек үҙгәргән?
Мәктәптә туҡланыу нисек үҙгәргән?

 Башҡортостанда был мәсьәлә 2019 йылдан системалы хәл ителә башланы – мәктәптә туҡланыуға тулы аудит үткәрелде, республика хөкүмәте яғынан күҙәтеү көсәйтелде. Балаларҙың һәм уларҙың ата-әсәләренең мөрәжәғәттәренә тиҙ арала яуап бирә башланылар. Район һәм ҡала башлыҡтары менән видеоселекторҙар уҙғарыла, хакимиәттәр ҡарамағында туҡланыуҙы күҙәтеүҙә тотоу буйынса ата-әсәләр комитеттары булдырылған, уҡыусыларҙың ата-әсәләре меню төҙөүҙә ҡатнаша, дегустацияларҙа даими ҡатнаша.

Республиканың барлыҡ мәктәптәре өсөн туҡланыуҙы ойоштороу буйынса стандарт раҫланған. Уҡыусылар өсөн ике аҙналыҡ берҙәм меню индерелгән.

Шуның менән бергә мәктәп ашханаларының матди-техник базаһын нығытыу дауам итә. Быйыл федераль программа буйынса уҡыу йылы башына 59 мәктәп бинаһында мәктәп туҡланыу блоктары һәм ашханалар ремонтланған һәм технологик ҡорамалдар менән йыһазландырылған. Бынан тыш, туҡланыу операторҙарын коммуналь түләүҙәрҙән бушатылған - бушатылған аҡса шулай уҡ етештереүҙе яңыртыуға, технологик ҡорамалдар һатып алыуға йүнәлтелгән.

Республиканың 300 меңгә яҡын уҡыусыһы бушлай туҡлана. Улар – башланғыс синыф уҡыусылары, сәләмәтлеге мөмкинлеге сикләнгән балалар, күп балалы аҙ тәьмин ителгән ғаиләләрҙән балалар, махсус хәрби операцияла ҡатнашыусыларҙың ғаиләләре.

«2019 йылда, республикала мәктәп туҡланыуы мәсьәләһен хәл итә башлағанда, хәл ҡатмарлы булды. Ялыуҙар күп булды, балаларҙы ситтән килтерелгән аҙыҡ-түлек менән һыйланылар. Беҙ хәлде үҙгәртә алдыҡ. Айырым категориялар буйынса урындағы аҙыҡ-түлек, мәҫәлән, ит өлөшө 90 процентҡа еткән. Иҫке һауыт-һабаны алмаштырҙыҡ, ашханаларҙы һәм аҙыҡ-түлек блоктарын яңыртырға теләнек, ҡорамалдар һатып ала башланыҡ. Был йәһәттән ҙур эштәр башҡарылды, әммә алда әле», - тип билдәләне республика Башлығы Радий Хәбиров социаль селтәрҙәге сәхифәһендә.

 

 

Фото: Т. АМАНОВ.

Автор:Гөлназ Шәйхетдинова
Читайте нас в