Депутаттар нисек эшләй?

РФ Дәүләт Думаһында Баш­ҡортостан исеменән 16 депутат эшләй. БР Президенты Рөстәм Хәмитов уларҙы «яңыртыу» тураһында ла әйткәйне.
«Комсомольская правда» гәзите, duma.gov.ru сайты мәғлүмәттәренә таянып, был депутаттарҙың эш һөҙөмтәлелеген иҫәпләп сығарған. Баҡһаң, араларында бигүк әүҙем булмағандар бихисап, имеш: алтауһы ғына ун һәм ундан ашыу закон өҫтөндә эшләүҙә ҡатнашҡан (бер йылға 2,5 закон тура килә). Иң әүҙем депутат – Граждан, енәйәт, арбитраж һәм процессуаль ҡануниәт комитеты рәйесе Павел Крашенинников. Уның аша 42 закон проекты үткән. Унан ҡала 28 закон менән Виктор Шудегов килә. Иң һүлпәне – Ринат Сәғитов. Ул оҙаҡ йылдар депутат булып ултырыу ваҡытында тик бер генә закон әҙерләүҙә ҡатнашҡан. Энгельс ҡолмөхәмәтов – ике, Спартак Әхмәтов өс закон эшләшкән. Үҙ аллы политолог Альберт Мифтахов иҫәпләүенсә, бында закон проекттарының һаны түгел, ә сифаты, йәмәғәт эштәрендә ҡатнашыу мөһим. Мәҫәлән, Әлмәт ҡалаһынан депутат булған Алина Кабаева, бәлки, бер закон да әҙерләмәгәндер, ә уның ҡабул итеүҙәр үткәреүе, спорт саралары ойоштороуы маҡтауға лайыҡ. Ә беҙҙә урамға сығып һораһаң, ун кешенең береһе генә булһа ла депутаттарҙың эшен һәм исемен атай алыуы икеле.

Әйткәндәй

Андрей Назаров 26 закон проектын әҙерләшкән. Владимир Таскаев – 19, Илдар Ғималетдинов – 16, Александр Фурман – 11, Морат Кейекбаев – 8, Алексей Сабадаш, Марсель Йосопов һәм Иршат Фәхретдинов – 6-шар, Юрий Афонин менән Рәмил Исҡужин – 5, Сәлиә Мырҙабаева – 4.