-21 °С
Ясна
Бөтә яңылыҡтар
Йәмғиәт
1 Февраль 2011, 14:59

ДАИ хеҙмәткәрҙәренә – офицер погондары

Техосмотр функцияһы элеккесә ЮХХДИ идаралығы иңендә ҡала. Был турала БР буйынса Эске эштәр министрлығының ЮХХДИ идаралығы етәксеһе Динар Ғилметдинов белдер­ҙе.

Техосмотр функцияһы элеккесә ЮХХДИ идаралығы иңендә ҡала. Был турала БР буйынса Эске эштәр министрлығының ЮХХДИ идаралығы етәксеһе Динар Ғилметдинов белдер­ҙе.
Хәтерегеҙҙә булһа, Эске эштәр министрлығын реформалау барышында ЮХХДИ-нан был бурысты алып, шәхси структураға биреү тураһында һүҙ булғайны. Әммә был ниәтте әлегә кисектереп торорға ҡарар ителде. Һәр хәлдә, транспорт сараларына техник тикшереү үткәреүгә элеккесә милиция яуаплы буласаҡ. Йәғни дәүләт автоинспекцияһы үҙ бурыстарын үтәүҙе дауам итәсәк. Шул уҡ ваҡытта был өлкәлә эшләүселәргә, Эске эштәр министрлығының башҡа подразделениеларындағы кеүек үк, ҡыҫҡартыуҙар ҙа янай. Мәҫәлән, былтыр автоинспекцияла эшләүселәр һаны 396 кешегә кәмеһә, быйыл йәнә 300 хеҙмәткәрҙе ҡыҫҡартыу ҡаралған. Шулай уҡ сафта бер генә сержант та булмаясаҡ. ДАИ-ла тик офицерҙар ғына хеҙмәт итәсәк. Бөгөн иһә «гаишник»тар араһында биш тиҫтәгә яҡын сержант, старшина һәм прапорщик иҫәпләнә. Алдағы ике айҙа составта аттестация үткәрелеп, хеҙмәткәрҙәргә офицер исеме биреләсәк. Ә һынауҙы үтә алмағандар менән хушлашырға тура киләсәк.
Етәкселек әлеге реформа ведомствоның абруйын күтәрәсәк, хеҙ­мәткәр­ҙәрҙең социаль проблемаларын хәл итеүҙе яҡшыртасаҡ, тигән фекерҙә. 2012 йылда ЮХХДИ-ла эшләүселәрҙең минималь эш хаҡы 33 мең һум булыр тип күҙаллана. Был, әлбиттә, талаптарҙы ла арттыра. Автоинспектор дөрөҫ һәм матур итеп һөйләшергә, ыҫпай булырға һәм һәр саҡ ярҙамға килергә әҙер булырға тейеш. Шулай уҡ «гаишник»тарға ярҙамға техника ла бүленәсәк. Был исемлеккә видеотеркәгестәр, алкотестар, радарҙар, тәҙрәләрҙең үтә күренеүсәнлеген үлсәү приборҙары һәм башҡалар инә. Әйткәндәй, автоинспекцияла эшләүселәр, техник прог­ресс мөмкинлектәрен иң әүҙем файҙаланған хеҙмәткәрҙәр булараҡ, енәйәттәрҙе асыуға ҙур өлөш индерә. Былтыр улар тарафынан өс меңгә яҡын енәйәт асылған. Шул уҡ ваҡытта республикала юғалған 98 машина табылмаған, юл-транспорт фажиғәһе урынынан ҡасҡан 10 водитель һаман­ғаса эҙәрлекләнә. Ә юл­дар­ҙа автотранспорт артыуын дауам итә. Былтыр ғына Башҡортостанда транспорт һаны һигеҙ процентҡа артҡан. Һөҙөмтәлә бөгөн республикала 1 мил­лион 250 мең транспорт берәмеге иҫәпләнә, шуларҙың 340 меңдән ашыуы Өфөлә теркәлгән. Рес­публиканың ЮХХДИ органдары көн һайын граждандарға уртаса 700 – 800 дәүләт номеры бирә.

Р. НУРИСЛАМОВА.