Мысырҙа – рәхәт, әммә үҙебеҙҙә барыбер яҡшыраҡ

ҡыҙыл диңгеҙ яры буйлап китеп барғанда ун ил туристары ултырған автобус Заафаран-Рас-Гареб трассаһының 25-се саҡрымында түңкәрелгән. Дүрт Рәсәй, ике Украина, ике Германия һәм бер Чехия гражданы һәләк булған.
Рәсәй туристары пассажирҙар автобусы һәләкәтенең нисек килеп сығыуы тураһында һөйләп биргән. Уларҙың барыһы ла водителдең ғәйепле булыуына күрһәтә: пассажир­ҙар автобустың тиҙлеген кәметеүен һораһа ла, ул быға ҡолаҡ та элмәгән. Әле водитель үҙе реанимацияла ята. Тәфтишселәр тикшереү эшен ҡуҙғат­ҡан. Төньяҡ Синайҙың туристарҙы ташыусы компанияһының лицензияһын кире алырға булғас, был фирманың туристарҙы Хургаданың турист властарының рөхсәтенән тыш ташыуы асыҡланған. Фирма етәкселәре менән әле прокуратура шөғөлләнә.
Хургаданан Каир госпиталенә самолет менән йәрәхәт алған 36 кеше оҙатылған. Улар араһында 17 кеше – беҙҙең илдән. Рәсәйҙең ике гражданы – реанимацияла. ҡалғандарҙың хәле тотороҡло – тәүге мөмкинлектә үк улар дауаханан сығыу яғын ҡарай.
Фажиғәлә Башҡортостандан өс кеше – 1986 йылғы Урал Шәрәфетдинов, 1986 йылғы Эльза Кадаева, 1973 йылғы Марат Ноков зыян күргән. 24 йәшлек Урал кәләше Эльза менән «баллы ай»ҙарын сәйәхәттә үткәрмәксе булған икән. Тик... Улар автобуста урта тирәлә ултырған. «Мин тәҙрәнән осоп сыҡҡанмын – 10 метр тирәһе алыҫлыҡта ята инем», – тип хәтерләй еңелсә тән йәрәхәттәре алған Урал. Уның кәләшенә ауырғараҡ тура килгән – автобус уңға-һулға бәрелгәндә ныҡ ҡына тән йәрәхәттәре алған, өҫтәүенә, башы ҡыҫылған. Автобустан уны башҡалар сығарып алған. Табиптар әйтеүенсә, уларҙың хәле ҡәнәғәтләнерлек, артыҡ йәрәхәттәре юҡ.