Мәктәп кәрәк-яраҡтары менән алмашыу акцияһы үтәсәк

– Был «Йәшел шәмбе» акцияһы ҙур әһәмиәткә эйә. Беренсе класс уҡыусыһын мәктәпкә йыйыу, Росстат мәғлүмәттәре буйынса, гаджеттар, гөлләмәләрҙе иҫәпкә алмағанда, 20 – 25 мең һумға төшә. Кейем менән алмашыу акцияһы ата-әсәләрҙең  аҙ ғына булһа ла аҡсаһын янда ҡалдырырға ярҙам итәсәк, – ти «Йәшелдәр» партияһының Мәскәү бүлексәһе рәйесе Александра Кудзагова.

«Йәшел шәмбе»гә мәктәп уҡыусыларына кәрәк булған барыһын да килтерергә мөмкин: мәктәп биштәрҙәре, пеналдар, кәнсә тауарҙары, мәктәп һәм спорт формаһы, смена өсөн тоҡтар, аяҡ кейеме, дәреслектәр, методикалар, дәфтәрҙәр, хатта ланчбокстар һәм һыу өсөн күп тапҡыр ҡулланыла торған шешәләр.

Төп шарт – әйберҙәр таҙа, йыртылмаған, боҙолмаған булырға тейеш. Бынан тыш, акцияға төрлө кейем, аяҡ кейеме һәм аксессуарҙар килтерергә мөмкин. Улар менән, халыҡ үтенесе буйынса, Өфөлә ай һайын алмашырға мөмкин.

Уҡыу кәрәк-яраҡтары менән алмашыу Милли музейҙа (Совет урамы, 14-се йорт), «Родина» кинотеатры фойеһында (Ленин урамы, 22-се йорт) һәм «Меркурий» тау саңғыһы комплексында (Кольцая урамы, 65) үтәсәк.

Әйткәндәй, был акция Өфөлә бишенсе тапҡыр ойошторола.