Бушлай оҫталыҡ дәрестәре үтте

Баш ҡалабыҙҙың 14 мәктәбенән 80-дән ашыу уҡыусы WorldSkills  стандарттары буйынса йыһазландырылған оҫтаханаларҙа булды, «Веб-дизайн һәм асыш», «Мәғлүмәт кабель селтәрҙәре», «Кейем-һалым интернеты», «Мобиль ҡушымталар әҙерләү» компетенциялары буйынса практик-йүнәлешле профессиональ заданиены үтәне.

– Мәғлүмәт технологиялары талап ителгән тармаҡтар рейтингын етәкләй. Шуның менән бергә өлкәлә бик күп яңы һәм перспективалы һөнәрҙәр барлыҡҡа килә. Был өлкәлә профессиональ киләсәктең уңышы күбеһенсә иртә профессиональ диагностикаға бәйле,  –  тип һөйләне республикабыҙҙың мәғариф һәм фән министры Айбулат Хажин.

Уларға мәсьәләләрҙе сисеүҙә «Йәш профессионалдар  – 2021» төбәк чемпионаты еңеүселәре һәм призёрҙары ярҙам иткән. Эштәр түбәндәгеләрҙе үҙ эсенә алған: база мобиль ҡушымта булдырыу, «аҡыллы әйберҙәр»ҙе программалаштырыу, веб-дизайн һәм асыштар менән танышыу, шулай уҡ ҙур булмаған кабель селтәре участкаһын проектлау һәм булдырыу.

Тәҡдим ителгән компетенциялар буйынса оҫталыҡты артабан үҫтереү өсөн Өфө радиоэлектроника, телекоммуникациялар һәм хәүефһеҙлек колледжы уҡыусылар өсөн «Инженерҙар мәктәбе» проектын бойомға ашыра.

Хәтерегеҙгә төшөрәбеҙ, Өфө радиоэлектроника, телекоммуникациялар һәм хәүефһеҙлек колледжы «Компьютер системалары һәм комплекстары», «Янғын хәүефһеҙлеге», «Янғын-һаҡ сигнализацияһы электромонтеры», «Мәғлүмәт системалары һәм программалау», «Мехатроника һәм мобиль робототехника», «Мәғлүмәт хәүефһеҙлеген тәьмин итеү», «Селтәр һәм системалы идара итеү» йүнәлештәре буйынса әҙерлек алып бара.

Фото: https://pravitelstvorb.ru/ru/press-office/news.php?ELEMENT_ID=54662.