«Уҡытыусыларға башҡа бер ерҙә лә беҙҙәге кеүек иғтибар һәм ихтирам юҡ»

Хәйбулла районы Аҡъяр 2-се урта мәктәбенең башланғыс синыфтар уҡытыусыһы Линиза Мөлҡаманованың педагогик стажы 20 йыл. 2007 йылда ул үҙенең райо­нында «Йыл уҡытыусыһы» конкурсында еңеү яулап, республика кимәленә ярышҡа сыға. Бында «Дәрес – күңел шиғриәте» номинацияһында еңеүсе була, былтыр «Уҡытыусы-оҫта» республика конкурсында еңеүгә өлгәшә. «Белеүемсә, «Мәғариф» өҫтөнлөклө милли проекты буйынса конкурста ҡатнашыу өсөн, уҡытыусының үҙенең генә түгел, уҡыусыларының да олимпиадаларҙа, йә башҡа конкурстарҙа һөҙөмтәләре булырға тейеш. Башланғыс синыфтарҙа ниндәйҙер һөҙөмтәләр күрһәтеп буламы һуң?» – тип ҡыҙыҡһынам.
– Әлбиттә, була. Хәҙер бит башланғыс синыф уҡыусылары араһында ла төрлө конкурстар бар. Мин балаларҙы 1-се синыфтан уҡ әҙерләй башлайым. Маҡсатҡа ярашлы эҙмә-эҙлекле эш алып барғанда, эшеңдең һөҙөмтәһе лә оҙаҡ көттөрмәй, – ти ул.
– Хеҙмәтеңде ошолай ҙурлап баһалауҙары – оло ҡыуаныс, әлбиттә. Әммә мин гел генә ата-әсәләрҙең, уҡыусыларыңдың рәхмәте – уҡытыусы өсөн иң ҙур баһа, тип иҫәпләйем, – тип үҙенең уй-кисерештәре менән дә уртаҡлашты.
Грант алыусылар араһында иң йәше, моғайын, Йылайыр районының Һабыр мәктәбенән тарих уҡытыусыһы Рөстәм Дилмө­хәмәтов булғандыр. Мәртәбәле конкурста еңеүгә уға йәшлеге лә, тәжрибәһеҙлеге лә ҡамасауламаған.
– Әлбиттә, еңермен тип уйламаным, грант алыу өсөн тағы бер нисә йыл эшләргә тура килер, тигәйнем. Ғөмүмән, быйылғы йыл минең өсөн уңышлы булды, «Йыл уҡытыусыһы» район конкурсында еңеүсе булдым. Йәштәр мәктәпкә барып, ике-өс йыл эсендә үҙен яҡшы яҡтан күрһәтеп, бар көсөн һалып эш­ләһә, яҡшы эш хаҡы ла аласаҡ, хеҙмәте лә лайыҡлы баһаланасаҡ, – ти ул.
Рөстәм Ришат улы ғилми-ғәмәли кәңәшмәләрҙә, интернет-конкурстарҙа ла әүҙем ҡатнаша, ауыл советы депутаты ла икән.
2007 йылдан Халыҡ-ара уҡытыу­сылар көнө алдынан республикабыҙҙың дәүләт теле уҡытыусыларына ла гранттар тапшырыла. Милләтебеҙҙең йөҙө булған башҡорт теле уҡытыусыларынан Стәрлебаш районының Перво­майский ҡасабаһынан Гөлнара Бәхтиәрова, Күгәрсен районының Воскресенское мәктәбенән Эльви­ра Аллабирҙина, Йылайыр районының Шәйехзада Бабич исемендәге башҡорт гимназияһынан Гөлшат Алғышаева ла бүләкләнеүселәр исемлегендә ине.
– Хеҙмәтебеҙҙең ошолай юғары кимәлдә баһаланыуы – беҙҙең өсөн оло ҡыуаныс, ул беҙгә мәртәбә өҫтәй, эшкә рухландыра. Милләтебеҙҙең йөҙө булараҡ, беҙгә – башҡорт теле уҡытыусыларына – һәр яҡтан алдынғы булырға кәрәк, – ти улар.