Кавалеристар тураһында тағы бер китап донъя күрәсәк

Бөйөк Ватан һуғышын үткән өс меңдән ашыу яугирҙың иҫтәлеген «Шайморатовсылар - легендар 112-се Башҡорт кавалерия дивизияһы яугирҙәре» биографик белешмәһендә мәңгеләштерәсәктәр.

– Ватанды дошмандан һаҡлаған һәр яугирҙың исеме лайыҡлы хәтерҙә. Улар хаҡында тулыраҡ мәғлүмәттәрҙе ебәреүҙе һорап, халыҡҡа  мөрәжәғәт иттек. Беҙҙең башланғыстың киң хуплау табыуына шатбыҙ - геройҙарҙың вариҫтары ярҙамында дүрт йөҙләгән исем яңы сығарылышҡа өҫтәлде. Бынан тыш, Бөтә донъя башҡорттары ҡоролтайының башланғысы Бөйөк Ватан һуғышына арналған күп порталдарҙа кавалеристар хаҡындағы  мәғлүмәттәрҙе яңыртыуға этәргес бирҙе, – ти Бөтә донъя башҡорттары ҡоролтайы проекты кураторы Гөлназ Аҡназарова.

 Белешмәгә хәрби мәғлүмәттәр һәм наградалар тураһында мәғлүмәттәр, фотоһүрәттәр, фронтовиктың документтары һәм 112-се Башҡорт кавалерия дивизияһы составында хеҙмәт итеү хаҡында шайморатовсыларҙың хәтирәләре ингән. Олаталарының иҫтәлектәрен, яҙмаларын һәм көндәлектәрен һалдаттарҙың туғандары  ебәргән.