ХӘЙЛӘҺЕҘ МАЖАРАЛАР

Буш һүҙ түгел, ошо көндәрҙә генә Мостай Кәрим исемендәге Милли йәштәр театры был герой мажаралары тураһында спектакль өҫтөндә эш башлаған икән. Ул мотлаҡ сағыу һәм күңелле, ҡыҙыҡлы һәм фәһемле, йырлы-моңло буласаҡ, тип вәғәҙә итәләр.

«Хәйләһеҙ мажаралар» тип аталасаҡ спектаклдең ҡуйыусы режиссеры – Башҡортостандың атҡаҙанған сәнғәт эшмәкәре Мөсәлим Күлбаев. Премьера май айына тәғәйенләнгән, тип хәбәр итте театрҙың әҙәбиәт бүлеге.

Хужа Насретдин тигәндән, бер көләмәс иҫкә төштө:

Хужаның ике ҡатыны булған. Уларҙың һәр ҡайһыһына ул зәңгәр муйынсаҡ биреп, бер-береһенә күрһәтмәҫкә ҡушҡан да:

– Был минең яратыу билдәһе булыр, – тигән.

Бер ваҡыт ҡатындарының икеһе лә бергә Хужаға килеп:

– Беҙҙең ҡайһыбыҙҙы нығыраҡ яратаһың? – тип һораған. Хужа уларға:

– Кемдә зәңгәр муйынсаҡ, шуны мин нығыраҡ яратам, – тигән.

Ҡатындары һәр береһе күңеленән:

– Тимәк, мине ул нығыраҡ ярата, – тип үҙен икенсеһенән юғары һанап тынысланған. Шулай итеп, Хужа ҡатындары менән татыу йәшәгән.