Флүрә Килдейәрова — Салауат Юлаев ордены кавалеры

Хөсәйен Әхмәтов исемендәге Башҡорт дәүләт филармонияһына Флүрә Килдейәрованың һөйәрмәндәре һәм уҡыусылары йыйылды. Йырсыны БР мәҙәниәт министры тәбрикләне һәм Башҡортостан Башлығының ҡотлау хатын уҡып ишеттерҙе. Әминә Шәфиҡова йырсыға республикабыҙҙың юғары наградаһы – Салауат Юлаев орденын тапшырҙы.

«Үҙегеҙҙең күп йыллыҡ намыҫлы хеҙмәтегеҙ менән Рәсәй йыр сәнғәтен үҫтереүгә тос өлөш индерҙегеҙ. Һеҙ – ҡатмарлы опера партиялары менән бер рәттән башҡорт халыҡ һәм эстрада йырҙарын берҙәй оҫта, юғары кимәлдә башҡарған йырсы. Үҙегеҙҙең йыр-моңға һәләтегеҙҙе һеҙ яратҡан уҡыусыларығыҙға тапшыраһығыҙ», – тиелә Башҡортостан Башлығының ҡотлауында.

Кисәлә халыҡ йырҙары, опера ариялары һәм классик музыка яңғыраны. Йырсыға Башҡортостандың халыҡ артисы Индира Әсәҙуллина һәм халыҡ-ара бәйгеләр еңеүсеһе Ксения Равнейко ҡушылып йырланы. Юбилярҙы уҡыусылары, республикабыҙҙың танылған сәнғәт оҫталары Иҙрис Ғәзиев һәм Йәмил Әбделмәнов тәбрикләне. Флүрә Әхмәтша ҡыҙы үҙенең  хәтирәләре һәм уй-фекерҙәре менән уртаҡлашты.