Бында мәғлүмәтләү генә түгел, ҡатмарлы ижтимағи-сәйәси мәсьәләләргә асыҡлыҡ индереү, төрлө, шул иҫәптән бер-береһенә ҡаршы ла, фекерҙәргә эфир биреү, китек тә булыуы ихтимал майҙанды шулай түңәрәкләндереү күҙҙә тотола. Дәүләт менән йәмғиәт бәйләнешен нығытыу, маҡсат-теләктәрҙе мәлендә еткереү, кәрәктә тәрәнгә төшөп ентекләү ҙә мөһим.
«Асыҡ студия» проектында, миҫалға, йәниҫәп темаһы йыш күтәрелә. Сөнки уға яҡынбыҙ – 15 октябрҙә башлана. Стационар участкаларҙа – 14, «Дәүләт хеҙмәттәре» порталында 8 ноябргәсә бара. Былтырғы октябрҙә үткәрелергә тейеш булып та, быйылғы көҙгә ҡалыуы сәбәбе – «тажзәхмәт», төшмәһен уға рәхмәт. Хәйер, бәлки, файҙаһы ла тейгәндер – ваҡыт күберәк булды. Бер нисә йыл элек тә алыҫ тойолманы, сөнки үҙенә ғайәт ҙур әҙерлек талап ителә – ни тиклем алданыраҡ башлана, ә тимәк, бөтә ваҡлығынаса диҡҡәт ҡылына, шул хәтлем камилыраҡ башҡарыла. Ифрат мөһимлеге әйтмәһәк тә билдәле: иҫәпһеҙҙең ҡуйы теүәлдер ҙә, әммә ысын теүәллекте һанау бирә.
Яңы, күп каналлы форматта уҙыры мәғлүм – яуап ҡылыу «Дәүләт хеҙмәттәре» порталында үҙаллы, йәнә лә күп функциялы үҙәктәрҙә һәм стационар участкаларҙа мөмкин. Ғәҙәти рәүеш тә һаҡлана: хисап алыусылар өйҙәр буйлап та йөрөр.
Ҡайһы һорауҙарға яуап бирергә кәрәк булыр һуң? Ошоға ла асыҡлыҡ өҫтәү ифрат урынлы – ваҡыты ҡәҙерле торһон алдан әҙерле.
– Ғөмүмән, йән иҫәбен алыу анкеталау бит. Йәште һорашалар, милләтте белешәләр, ғаилә хәле, белем, табыш, торлаҡ шарттары һәм башҡалар менән ҡыҙыҡһыналар, тинек ошо арала, мәҫәлән. Анкеталарҙы тура эфирҙа тултырып ҡарағаныбыҙ ҙа булды, быны дауам да итеү ниәтендәбеҙ.
– Кемдәрҙең иҫәпкә алынырына диҡҡәт ҡылғанда, илдең бөтә кешеләре лә, Рәсәй гражданымы ул, юҡмы – мөһим түгел, тиелде. Шарт бер генә – сит ил кешеләре бында бер йылдан ашыуыраҡ йәшәргә йә шуны планда тоторға тейеш. Ситтә – командировкала, дауаланыуҙа, сәйәхәттә булған рәсәйҙәр ҙә ҡатнаша. Һуңлап ҡуябыҙ ҡайһы саҡ. Йәниҫәп тамамланғас, барһаҡ, сәбәбен аңлатһаҡ, мәҫәлән, ай буйы дауаханала ятҡаныбыҙҙы атаһаҡ, хәлебеҙгә инерҙәрме? Юҡ. Сөнки былай иҫәп алыу принциптарының береһе – бер мәллелек боҙола. Йәғни дәүләткә халыҡтың тәғәйен ошо ваҡытта нисек йәшәгәне тураһында ҡыҫҡа арауыҡта мәғлүмәт туплау мөһим, оҙаҡҡа китһә, теүәллек кәмей. Ә был ваҡытта сит илдә командировкала икәнһең, заман уңайлығын файҙалан – дистанцияла тултыр. Сирләһәң, бергә йәшәгән яҡындарың яуап бирә ала.
Иҫәп алыусы исем-атыңды һорашыр, әммә анкетаға индермәҫ. Бер үк кешегә ҡабат-ҡабат мөрәжәғәт итмәҫ өсөн генә был. Паспорт йә башҡа документ таптыра алмайҙар. Башҡаһын да – миҫалға торлаҡ йә табыш тураһындағы ҡағыҙҙарҙы талап итеү хоҡуғы юҡ. Кеше нисек яуап бирә, шулай яҙыла. Бер яҡтан, был һәйбәт – нимә әйтһәң дә иреклеһең, әммә азатлыҡ ипле булһынсы – милләтеңде туҙға яҙмаған һүҙ менән билдәләп ултырма инде. Киреһенсә, ғорурланып белдер, киләсәк быуындар өсөн яуаплылыҡ той, сылбырҙы өҙмә. Асыҡлыҡ юҡ икән, шәжәрәңде барла, документаль сығанаҡтарға төбәл.
Йәниҫәп – һандар, иҡтисади, социаль фаразлау ысулы ғына түгел, ә ил, халыҡ йылъяҙмаһы ла. Тарихты шул иҫәптән ана шул һанауҙар һөҙөмтәләре буйынса ла анығыраҡ күрәбеҙ бит бөгөн, үҙебеҙҙең дә киләсәк өсөн яҡты ҡалыуыбыҙ мөһим. Ҡыҙыл еп булып эфирҙа үткән фекер — ошо ла.
Рәсүл Сәғитов,
хәбәрсе һәм яҙыусы.