Әгәр прокурор булһам... (Юмористик хикәйә)

Ә  ниңә  һуң  бына  беҙгә,   башҡала ла  йәшәп,   гәзит – журнал  редакцияларында  эшләүсе  журналист,  әҙиптәргә  шундай  баһа  бирмәйҙәр  икән?!   Ни   тиһәңдә  беҙҙең   күпселегебеҙ,  йә  атҡаҙанған  мәҙәниәт  хеҙмәткәре,   йә  атҡаҙанған   матбуғат  һәм  киң  мәғлүмәт  хеҙмәткәре  исемдәрен  ғорур  күтәреп  йөрөүсе,  билдәле  әҙиптәр  бит  әле! 

Ә   уның   берәй  маҡтаулы  исеме  бармы?   Ҡасандыр  Рауил  Бикбаев  биргән  рәхмәт  хатынан  башҡа,  бер  маҡтанырлыҡ  әйбере лә    юҡ  уның!   Кем  һуң  ул,  уны  шул  хәтлем  күтәрергә?   Йәш  сағында  яңлышып,  енәйәт  ҡылып,  Себер  яҡтарында  төрмәлә  ултырып  сыҡҡан  бер  алдаҡсы,  жулик  инде!   Шул  замандың  яҙыусы,  шағирҙарына  аптырайым  мин:  ошо  йылғыр  аферистың  ялған,  шиғри  һүҙҙәренә  ышанып,   Мәскәүҙең  үҙенә  тиклем  ярлыҡау  яҙып,  уны  дүрт  йыл  алдан,  шартлы  рәүештә  иреккә  сығарырға  өлгәшкәндәр  бит  әй!   Етмәһә,  йүгереп  йөрөп,  рекомендациялар  яҙып,  Яҙыусылар  союзына  ағза  итеп  алғандар,  әллә  күпме  китаптарын  сығарышҡандар!

Әгәр  прокурор  булһам,  иреккә  сығарыу  түгел,  киреһенсә  биш – алты  йыл  өҫтәр  инем  мин  уға!  Бахыр,  шиғриәткә  ышыҡланып  иреккә   сыҡты ла,  йөрөй  хәҙер  арабыҙҙа  түш  киреп,  әллә  кем  булып,  беҙҙең  ҡыйыш – мыйыштарҙан  көлөп,   юмористик  хикәйәләр  яҙып.  Тереләй  һуйып  ҡуя  бит  әй,  тереләй  атып  үлтерә,    үҙенең  үткер  һүҙҙәре  менән!

Ә  ысынында  кем  һуң  ул  үҙе?  Анау,  әллә  ҡайҙа  ятҡан,  төпкөл  бер  тимер  юл  станцияһында,  ҡаҙанлыҡта  ут  яғыусы  булып  эшләүсе,  ябай  ғына  бер   ҡара  эшсе   инде.   Тоталар ҙа  шуның    шиғыр – хикәйәләрен  йә  теге,  йә  был  гәзит – журналдарҙың   сайтына  ҡуялар.  Шул  мөртәттең   әҫәрҙәрен   баҫтырмағыҙ,    маҡтап  комментарийҙар  яҙмағыҙ,  лайктар  ҡуймағыҙ,  тип  күпме  әйтәм    үҙемдең  таныш  журналист,  әҙиптәргә.   Юҡ,  аңламаһа  аңламай  икән  кеше!   Ана,  кисә  генә  үҙемдең  ҡул  аҫтымда  эшләүсе,  йәш  журналист  ҡыҙыҡай:

-Мөстәфил  Хәсрәтович,  анау  Ҡамай  Заһирҙың  бер  бик  фәһемле  хикәйәһен  журналдың  алдағы  һанына  бирәйек  әле,  тип  эргәмә  килеп  кергән.

- Мин  шундай  абруйлы  журналда  төрмәлә  ултырып  сыҡҡан  бәндәнең   яҙғандарын  баҫтырмаясаҡмын ! -    тип,  екерҙем  тегегә.

-Ә  ниңә  һуң  былтыр  уның  ирек,  ҡурай   тураһында  яҙылған   шиғырҙар  шәлкемен   баҫтырҙығыҙ  һуң? – тип  телләшә  еңмеш  ҡыҙыҡай.

-Былтыр  баҫтырғанды – быйыл  һөйләмәйҙәр!   Ул  саҡта  беҙгә  яңы  геройҙар  кәрәк  булды. Сөнки  тиражыбыҙ  хатта  бер  меңгә лә  тулмай  ине! –тип   аҡландым  тегегә.    Етмәһә,  “От  тьюрмы  и  от  сумы  не  зарекаются”  - тип  мыңғырҙаған  була  бит  әле  маңҡа!  Йәнәһе,  ана   хатта   министрҙарҙы  ҡулға  алып,  зинданға  ябалар,  имеш.   Япһалар  ни,  урлашҡандар  тимәк!  Бына  мине  берҙә  килеп  ҡулға  алмайҙар  бит.  Сөнки  намыҫым  таҙа,  иманым  ныҡлы!   Асыуым  килеп,  бер  екергәйнем,   ҡыҙарып – бүртенеп,  күҙҙәрен  йәшләндереп,  нисек  кергән,  шулай  тиҙ  генә  сығып  китте,  меҫкен  ҡыҙыҡай  бүлмәмдән.

...Тоталарҙа  Ҡамай  Заһир,  тип  шуның  ижадын  данлайҙар.  Йәнәһе  ул – халыҡ  араһынан  сыҡҡан “ самородок”.  Торғаны  менән  бер  жулик  ул!  Етәкселәр  менән  һөйләшеп,   яҙыусылар  союзынан  ҡыуҙыртам  мин  уны,  биллаһи!   Исеме  ҡалай  мәғәнәһеҙ  – Ҡамай.  Ни   башҡорт,   ни  татар  түгел.  Әллә  сыуаш,  әллә  типтәр  инде?  Ҡай  тарафтарҙан  тибелеп,  беҙҙең  эргәгә  килеп  кергәндер  ул?   Торғаны  бер  аферист ,  бунтарь  бит  ул!   Иһ,  прокурор  түгелмен,   әгәр  прокурор  булһам,  мин  уны  кире  төрмәгә  яптырыр инем.  Әйҙә,  ултырһын  шунда  ирек! – тиеп  набат  ҡағып!

Рамай  Ҡаһир.