"Йондоҙ"ло табынды Әнүзә ЯҠУПОВА әҙерләй

“Мимоза” салаты

Был – ҡатлап яһалған классик салат. Мотлаҡ ингредиенттар – майлы балыҡ консер­ваһы (сәнске менән иҙергә), бешкән кишер (ҡырырға), һуған (ваҡ­лап турарға) һәм бешкән йомортҡа (ағын һа­рыһынан айырып, сәнске менән иҙергә.)
Салаттың һәр ҡатына майонез һыларға. Ә иң өҫкә йо­мортҡа һарыһын һибегеҙ: ул мимоза сәскәһен хәтер­лә­тә­. Йәшел тәмләткес үләндәр менән биҙәргә мөмкин. Мин тағы ла байрам табыны өсөн әҙерләгәндә, был салатҡа ҡырылған ҡаты йәки ире­телгән сыр өҫтәйем. Һәм салатты төрлө йәнлек йәки сәскә формаһында эш­ләһәң, ул табынды биҙәп ултырасаҡ.

Ҡыҙҙырылған 
тауыҡ бото

Бер әсе боросто оҙонсалап уртаға ярырға. Яртыһын ор­лоҡтарынан та­ҙартып, ваҡлап турарға. Икенсе яртыһын бө­тәүләй ҡалдырырға. Туралған боросҡа ике балғалаҡ бал, бер балғалаҡ тоҙ, ярты лайм һуты һалып, яҡшылап бутарға. 
Дүрт тауыҡ ботон йыуып, ҡоротоп, һәр береһен икешәр өлөшкә бүлергә. Уларға баллы ҡатнашманы һөртөп, берәй сөм һауытҡа һалырға, өҫтөнә ҡалған ҡат­нашманы ҡойоп, һалҡынса урында 15 минут тирәһе ултыртып торорға.
Табаға фольга йәйеп, өҫтөнә махсус тимер рәшәткә ҡу­йырға. Тауыҡ боттарын шул рәшәткәгә теҙеп, янына ту­ралмаған борос яртыһын һәм дүрт өлөшкә телен­гән ярты лаймды ҡуйырға. 210 градус эҫелектәге мейестә 25 минут тирәһе бешереп алырға. Ит киҫәктәрен бер тапҡыр аҫтын өҫкә әйләндереп һалырға онот­мағыҙ.
Табынға итте бешкән ярма йәки йәшелсәләр менән би­рергә мөмкин.

“Аҡлы-ҡаралы” желе

30 г желатинды 50 мл һалҡын һыуға һалып бутарға ла, бер аҙ бүрттергәс, микротулҡынлы мейескә ҡуйып, иретеп алырға. Һыуынғас, уға ике стакан ҡаймаҡ (20 процент ҡуйы­лыҡтағы), ике ҡалаҡ шәкәр оно (пудра), бер балғалаҡ лимон һуты һалып, яҡшылап бол­ғатырға. Был массаны десерт һауыттарына (яҡынса 4 – 5 порция буласаҡ) яртылаш һалып, өҫтөн тигеҙләргә һәм ҡатҡансы һы­уытҡыста тоторға.
25 г желатинды 50 мл һыуыҡ һыуға һалып бүрттерергә. Ике стакан һөткә ике ҡалаҡ шәкәр һалып, ҡайнатып сы­ға­рырға. Уға тағы ла дүрт ҡалаҡ какао өҫтәп, ҡайнатып сығарырға ла, уттан алырға. Желатинды ҡай­нар һөт ҡат­нашмаһына ҡушып, бутай-бутай һы­уытырға һәм иләктән үткәрергә. Ул бер аҙ ҡуйыра башлағас, десерт һа­уы­тын­дағы ҡаймаҡлы ҡат­нашма өҫтөнә ҡо­йорға. Ҡабат һыуытҡысҡа ултыртып, ҡатҡа­нын көтөргә.
Табынға биргәндә желе өҫтөн ҡы­рылған шоколад менән биҙәргә мөмкин.

Гөлнур ҠЫУАТОВА яҙып алды.