Йондоҙнамә (17 – 23 март)

Ылаҡ (22.12 – 20.01)

Үҙһүҙлегегеҙ арҡаһында уйламаған сығымдар килеп сығыуы ихтимал. Йондоҙҙар аҡсаға бәйле мәсьәләләрҙә яҡындарығыҙ менән кәңәшләшергә ҡуша. Осраҡлы, өмөтлө күренгән тәҡдимдәрҙән ары тороғоҙ.

Һыуғояр (21.01 – 19.02)

Эштәрегеҙ көткәндән күберәк булмаҡсы. Яҡындарығыҙ төрлө ваҡ-төйәк мәшәҡәт өҫтәп торор. Ҡайһы берҙәренән баш тартырға тырышығыҙ. Был арала кемдер элекке бурысын ҡайтарыр, бәлки.

Балыҡ (20.02 – 20.03)

Тормошоғоҙҙа үҙгәрештәр булыр. Бының ахырын әлегә төҫмөрләүе ҡыйыныраҡ. Был арала бәғзеләр элекке бәйләнештәрҙе яңыртыр. Көткән аҡса әлегә килмәҫ.

Ҡуҙы (21.03 – 20.04)

Көндәлек эштәрегеҙ ҙур ҡыйынлыҡтар менән барыр. Йыш ҡына эсегеҙ бошоуы ла ихтимал. Яҡындарығыҙ менән араларҙы боҙмаҫ өсөн һеҙҙән түҙемлек талап ителә. Күптән күрмәгән танышығыҙ үҙе хаҡында белгертер.

Буға (21.04 – 21.05)

Үҙ көсөгөҙгә ышанысығыҙ артыр. Шулай ҙа шишәмбелә хаталар, буталыш килеп сығыуы бар. Бәғзеләрҙең яңылыш кәрәкмгән һүҙ ысҡындырып ебәреүе мөмкин. Шәхси тормошоғоҙҙа үҙгәрештәр көтөлә.

Игеҙәктәр (22.05 – 21.06)

Мәшәҡәтле осор. Буш ваҡытығыҙ бик аҙ булыр моғайын. Ниндәйҙер етди мәсьәлә һеҙҙе һаман да борсой һымаҡ. Әлегә уны хәл итеү өсөн мөмкинлектәрегеҙ бөтөнләй юҡ, тиерлек.

Ҡыҫала (22.06 – 23.07)

Килеп сыҡҡан ҡыйынлыҡтар кәйефегеҙҙе бер аҙ төшөрөр. Ысынында, эштәрегеҙ бигүк насар бармай. Иң мөһимен башҡара алырһығыҙ. Кесе йомала уйламаған яҡтан ярҙам да килер, бәлки.

Арыҫлан (24.07 – 23.08)

Был арала үҙегеҙгә иғтибар артҡанын асыҡ тойорһоғоҙ. Ярҙам һораған кешеләр ҙә мотлаҡ күбәйер. Яңы танышлыҡтар ҙа булдырырһығыҙ. Йомала һәләттәрегеҙҙе күрһәтергә сәбәп табылыр.

Ҡыҙ (24.08 – 23.09)

Аҙна ҡыйыныраҡ башланып китер. Алдығыҙҙа хәл итә алмаҫлыҡ мәсьәләләр күбәйеп киткәндәй тойолор. Шишәмбенән һуң ыңғай үҙгәрештәр асыҡ беленә башлар. Кесе йомала кәйефегеҙҙе күтәрерлек яңылыҡ ишетерһегеҙ.

Үлсәү (24.09 – 23.10)

Аралашыуҙа мотлаҡ уңырһығыҙ. Таныштарығыҙҙан файҙалы хәбәрҙәр ишетерһегеҙ, ниндәйҙер этәргес көс тә алырһығыҙ. Янығыҙҙа ышаныслы кешеләр барлығын да күрерһегеҙ. Был арала элекке теләгегеҙ бойомға ашыр.

Саян (24.10 – 22.11)                                    

Көндәр һәйбәт килергә оҡшай. Шишәмбелә кемгәлер етди ярҙам итерһегеҙ, бәлки. Бәғзеләр үҙ эштәрен дә туҡтатып торор хатта. Кесе йомала элек ауыр күренгән мәсьәләне еңел генә хәл итерһегеҙ.

Уҡсы (23.11 – 21.12)

Мәшәҡәттәрегеҙ ҡәҙимгенән күбәйер. Ҡайсаҡ бер юлы ике-өс эште башҡарырһығыҙ. Алыҫ булмаған юл-сәфәрҙәр уңышлы көтөлә. Йомала бер кемгә ҡарамай, етеҙ эш итергә кәрәк булыр.

ӨМӨТБАЙ.