“Йондоҙло табын” - Булат САРБАЕВ

“Донат” десерты

Үҙемде, аш-һыу оҫтаһы, тип атай алмайым. Шулай ҙа ғаиләмде, һи­рәкләп булһа ла, еңел генә әҙер­ләнгән тәмлекәстәр менән һыйлап алам. Шуларҙың береһе “Донат” тәмлекәсе.
Татлы икмәк – “Ромашка” кү­мә­сен алып, һәр бүлкәтен икешәр киҫәккә теләһең дә, 3-әр балғалаҡ ҡуйыр­тылған һөт (сгущенка) һы­лайһың һәм тәрилкәгә теҙеп һа­лаһың. Өҫтөнә ҡырылған шоколад һәм шәкәр онтағы һибәһең.

Тауыҡ итенән 
шешлек

Был ризыҡтың үҙенсәлеге – маринад. 800 г тирәһе тауыҡ ите өсөн 200 мл һөт өҫтөнә (сливки) 2 ҡалаҡ соя соусы, 1 ҡалаҡ зәйтүн майы, ваҡлап туралған 3 – 4 бүлкәт һарымһаҡ, 30 г имбирь, ярты әсе борос, 1 татлы борос, кинза тәмләткесе һәм кориандр һалып, яҡшылап бутарға. Киҫәктәргә бүленгән тауыҡ итенә (8 – 9) ошо маринадты һалып бутағас, 12 сәғәт һыуытҡыста ултыртып торорға.
Шешлекте бешергән саҡта өҫтөнә әҙ-әҙләп маринадты ҡойоп торһаң, ул йомшаҡ һәм һутлы булыр.

Йәшелсә ашы

Таҙартылған 1 болгар боросон – туҡмаслап, 3 картуфты, 2 кишер, 1-әр          пастернак һәм петрушка тамырын йыуып, әрсеп, шаҡмаҡлап турарға. Барлыҡ йәшелсәне һыулы (2 л) кәстрүлгә һалып, һүрән утта 15 минут ҡай­натырға.
300 г сәскәле кәбеҫтәне йыуып турарға ла ашҡа һалырға. Тағы ла 20 минут бешергәс, самалап тоҙ, йәшел тәмләткестәр (укроп, петрушка, һуған), 100 г аҡ май өҫтәп, 5 минут утта тоторға. Табынға ҡаймаҡ йәки майонез менән бирергә мөмкин.

Гөлнур ҠЫУАТОВА әҙерләне.