Итле бәлеш
Ярты литр ойоған һөткә ике ҡалаҡ ҡаймаҡ, ярты стакан үҫемлек майы, самалап тоҙ, сода йәки ҡамыр ҡабартҡыс (разрыхлитель) һалып, туғырға ла, аҙ-аҙлап он һалып, йомшаҡ ҡамыр баҫырға. Уны бер аҙ йылы урында ултыртып алырға кәрәк.
Был арала эслек әҙерләргә була. Тауыҡ йәки артыҡ майлы булмаған һарыҡ итен ваҡлап турарға. Һуған менән картуфты таҙартып, иттән эрерәк итеп турарға. Уларҙы бергә ҡушып, тоҙ, борос һалып бутарға.
Ҡамырҙы ике өлөшкә бүлеп (береһен бәләкәйерәк итергә кәрәк), йәйергә. Ҙурырағын майланған табаға һалып, ситтәрен күтәреңкерәп ҡуйырға. Эслекте һалып, тигеҙләп сыҡҡас, өҫтөн икенсе йәймә менән ҡаплап, ситтәрен йәбештерергә.
Бәлеште 180 градус эҫелектәге мейестә 60 – 70 минут бешерергә. Әгәр өҫтө ныҡлап ҡыҙара башлаһа, 150 градусҡа тиклем утты кәметегеҙ.
Яҫмыҡ менән быҡтырылған ит
1,5 кг һарыҡ итен эре киҫәктәргә турарға. Кәстрүлгә зәйтүн майы ҡойоп, утты көслө итеп асырға һәм ит киҫәктәрен ике яҡлап алтынһыу төҫкә ингәнсе ҡыҙҙырырға ла икенсе һауытҡа алып торорға.
Ике һуғанды, дүрт тырнаҡ һарымһаҡты, ярты әсе боросто (әсе ризыҡ яратһағыҙ, бер борос һалырға була) турап, талғын утта ит ҡыҙҙырылған майҙа ҡыҙҙырырға.
Биш минуттан итте йәшелсәләр өҫтөнә һалып, бер стакан ҡайнар һыу ҡойоп, бер сәғәт быҡтырырға. Ике стакан йәшел яҫмыҡты (чечевица) йыуып, ярты сәғәт һалҡын һыуҙа ултыртып торорға ла, ит өҫтөнә һалырға. 2,5 стакан ҡайнар һыу һалып, тағы ла 40 минут быҡтырырға.
450 г үҙ һутында консерваланған помидорҙы блендер менән иҙеп (артыҡ ҡабалан булғанда, дүрт ҡалаҡ томат пастаһы алырға була), бер ҡалаҡ кориандр, бер балғалаҡ төйөлгән зира, самалап тоҙ, ҡара борос, туралған кинза менән биш япраҡ бөтнөк һалып бутағыҙ ҙа, ит менән яҫмыҡ өҫтөнә һалырға һәм тағы ла 15 минут бешерергә. Утты һүндерер алдынан ярманы ашап ҡарарға кәрәк. Әгәр ҡатыраҡ булһа, тағы ла 5 – 10 минут бешереп алырға һәм, утты һүндергәс, 15 минут томалап торорға.
Ҡыҙҙырылған һыла балығы
600 г балыҡты өлөштәргә бүлеп, ҡылсыҡтарынан таҙартырға.
Ике ҡалаҡ соя соусына ¼-әр балғалаҡ төйөлгән имбир менән дәрсен, самалап тоҙ, ҡыҙыл борос һәм туралған йәшел һуған һалып бутарға. Балыҡ киҫәктәрен ошо маринадҡа һалып, бер сәғәт ултыртып торорға. Аҙаҡ уны майланған табаға теҙеп, 180 градус ҡыҙыулыҡтағы мейестә 10 минут бешерергә кәрәк.
Табынға балыҡты бешкән дөгө менән өҫтөн лимон киҫәге, петрушка һәм салат япрағы менән биҙәп бирергә.
Гөлнур ҠЫУАТОВА әҙерләне.