“Йондоҙло табын”ды Әминә Яхина әҙерләй

Итле солянка 

500 г һөйәкле итте 2,5 л һыуға һалып, талғын утта ике сәғәт бешерергә. Бешкән итте һур­па­нан алып, һөйәгенән та­ҙартырға ла, өлөштәргә ту­рарға. 
2 баш һуғанды турап, 3 ҡалаҡ майҙа еңелсә ҡыҙҙырырға. Уға 2 ҡалаҡ томат пастаһы, 3 тоҙло ҡыяр, 100 мл һурпа һалып, бер аҙ бешерергә. Был массаны һө­ҙөл­гән һурпаға һалып, утҡа ҡуйырға. Туралған ит, 100 г кипкән ҡара емеш, самалап тоҙ, лавр япрағы һалып, 5 минут бешерергә. 300 г итле ри­зыҡтарҙы (колбаса, ыҫланған ит, сосиска, тел һәм башҡалар)  турап өҫтәргә һәм аш әҙер булғансы (тағы ла 5 минут тирәһе) ҡайнатырға. Табынға биргәндә һәр тәрилкәгә йоҡа ғына итеп теленгән лимон киҫәге, 2 – 3 зәйтүн емеше, 2 ҡалаҡ ҡаймаҡ һалып бирергә кәңәш ителә. 

Ҡыҙҙырылған
балыҡ

4 ҡалаҡ онға тоҙ, борос һәм башҡа тәмләткестәр һалып бутарға. 600 г балыҡты (камбала йәки палтус) өлөштәргә бүлеп, онда әүәләп, үҫемлек майында ҡыҙҙырырға.
Тәрилкәгә балыҡты һалғас, өҫтөнә ярым түңәрәкләп турап ҡыҙҙырылған һуған (200 г) һибергә. Табынға ҡыҙҙырылған картуф һәм йәшел тәмләт­кестәр менән бирергә.

Манты

500 г иләнгән онға 1 стакан йылы һыу, 1 йомортҡа, 3 ҡалаҡ көнбағыш майы, 2 ҡалаҡ майонез, 1,5 балғалаҡ тоҙ һалып, ҡамыр баҫырға. Эслекте әҙер­ләгәнсе уны полиэтилен ҡап­сыҡҡа төрөп, һыуытҡысҡа ҡуйып торорға. 
Эслек өсөн 300 г үткәрелгән ит, ваҡлап туралған 3 – 4 картуф, 2 һуған, 100 грамм һа­рыҡтың йә ҡаҙҙың эс майы, яртышар балғалаҡ борос, тоҙ һәм кориандр, 40 – 50 мл һыу кәрәк. Уларҙың барыһын бергә ҡушып, яҡшылап бутарға. 
Ҡамырҙы йоҡа итеп йәйеп, уны эре шаҡмаҡтарға ҡыр­ҡырға һәм эслек һалып, манты бөрөргә. Манты бешерә торған һауыттарҙы майлап, манты­ларҙы теҙергә. Уларҙы быуҙа 40 – 45 минут бешерергә.

    Гөлнур ЮЛДАШЕВА әҙерләне.