Барыһы ла законға ярашлы

«Йәшлек» гәзитендә БР Ер һәм мөлкәт мөнә­сәбәттәре министрлығының ерҙәрҙе һатыуға ҡуйыу, арендаға биреү буйынса иғландары баҫыла башлағас, гәзит уҡыусыларҙан: «Йәшәп ятҡан ерҙәребеҙҙе ситтәр һатып алып, хужа буламы?» тигән һорауҙар килә башланы, редакцияға күп шылтыратыу булды.
Бындай иғландар бирелеүе яңылыҡ түгел: киң мәғлүмәт сараларында күптән баҫыла. Беҙҙең гәзит быйыл тәүге тапҡыр күләмле иғландарҙы ҡуйҙы.
Ниндәй маҡсатта был белдереүҙәр  бирелә? Ошо һорау менән беҙ БР Ер һәм мөлкәт мөнәсәбәттәре министрлығына мөрәжәғәт иткәс, уларҙан түбәндәге яуап килде.

«Ер участкаларын биреү РФ Ер кодексына ярашлы башҡарыла. Ерҙәр­ҙе һатыу, ҡуртымға алыу килешеү­ҙәре төҙөү аукцион формаһында уҙғарылған сауҙала  (торги) баш­ҡарыла (РФ Ер кодек­сының 2-се пункты 39.3 һәм 39.6-сы статьяларында ҡа­ралғандан тыш).  Төҙөлөш, шәхси хужалыҡ алып барыу, баҡса ултыртыу, крәҫтиән-фермер ху­жа­лығын ойоштороу өсөн ер алырға теләүсе граждандар вәкәләтле ор­ганға (БР Ер һәм мөлкәт мөнә­сәбәттәре министр­лығына) ер участкаларын биреүҙе алдан раҫлау тура­һында ерҙең кадстр номер­ҙарын йәки урынлашыу схемаһын күрһәтеп, ғариза яҙа. Ведомство 14 көн эсендә ер участкаһын биреү тура­һында иғлан баҫтыра, ми­нистрлыҡтың сайтына ҡуя, ерҙең бирелмәүе ту­раһында ҡарар сығара.
Ер участкаларын һатыуға  аукцион ойоштороу  йәки аренда килешеүе төҙөүгә хоҡуҡҡа аукцион РФ Ер кодексының 39.11-се ста­тьяһы менән нигеҙләнә.
Аукцион үткәрелгәндә уның еңеүсеһе тип ер участкаһына ҙурыраҡ сумманы тәҡдим иткән йәки йыллыҡ аренда хаҡын кү­берәк түләүсе ҡатна­шыусы таныла».

МӨХӘРРИРИӘТ.