Тауыҡ итенән
бәлеш
Бәлеш өсөн әсе ҡамыр ҙа, сөсөһө лә бара. Беҙ, ғәҙәттә, сөсө ҡамыр менән бешерәбеҙ. 200 г ҡаймаҡҡа самалап тоҙ, сода, 2 йомортҡа һалып, бутайбыҙ. Аҙаҡ 1,5 – 2 стакан тирәһе он ҡушып, ҡамыр баҫырға ла, бер аҙ ял иттерергә.
Эслек өсөн тауыҡтың 500 г түш итен ваҡлап турарға. Уға шулай уҡ ваҡлап туралған 3 һуған, 6 картуф өҫтәргә. Тоҙ, ҡара борос, йәшел тәмләткестәр һалып бутарға.
Ҡамырҙы ҙурыраҡ һәм бәләкәйерәк ике өлөшкә бүлеп йәйергә лә, ҙурырағын майлы табаға һалырға. Эслекте тигеҙләп һалғас, өҫтөнә 50 г аҡ майҙы ҡырырға йәки 50 мл һыу ҡойорға кәрәк. Былай иткәндә ул һутлыраҡ була. Икенсе йәймә менән өҫтөн ҡаплағас, ситтәрен семтеп сығырға. 180 градуслы ҡыҙыу мейестә 50 – 60 минут тирәһе бешерергә.
Лимонлы соустағы
алабуға балығы
800 г алабуға (окунь) филеһына 2 балғалаҡ мөшкәт сәтләүеге, 2 ҡалаҡ ваҡлап туралған укроп, самалап тоҙ, борос, 2 лимондың һутын һибеп, 3 сәғәт һалҡын урында маринадларға. Филены 4 өлөшкә бүлеп, табала йәки грилдә ике яҡлап 7 минут ҡыҙҙырырға. Балыҡты табынға эҫе килеш, махсус соус һәм гарнир менән бирергә.
Соус әҙерләү өсөн 125 мл һөт өҫтөн (сливки) ҡайнатып сығарғас, болғата-болғата тәүҙә 50 г аҡ май, 2 ҡалаҡ лимон һуты өҫтәргә. Утын һүндергәс, ваҡлап туралған йәшел һуған һалырға.
Шпинатлы салат
2 йомортҡаны ҡаты итеп бешерергә лә, таҙартып, 4-әр өлөшкә бүлергә. ¼ өлөш ҡыҙыл һуғанды артыҡ ваҡ итмәй генә турарға. 100 г шпинатты йыуып, һарҡытырға.
Тәрилкәгә уларҙы өйөп һалғас, өҫтөнә бер ус һарымһаҡлы сохарый, самалап тоҙ, 2 ҡалаҡ зәйтүн майы һибергә.
Гөлнур ЮЛДАШЕВА әҙерләне.