Бөтә яңылыҡтар
Махсус биттәр
5 Июнь , 07:00

"Йондоҙло" табын - Наилә ШӘРИПОВА

Бөгөн үҙенең аш-һыу серҙәре менән һәүәҫкәр йырсы, “Юлдаш” йыры” конкурсы лауреаты Наилә ШӘРИПОВА бүлешә.

Ҡаймаҡлы бәлеш

200 г аҡ май, 100 г шәкәр, 2 йомортҡа, 300 г он һәм 1,5 балғалаҡ ҡамыр ҡабартҡысты  бергә бутап, йом­шаҡ ҡына ҡамыр баҫырға. Уны ярты сәғәт һыуытҡыста тотоп алырға кәрәк. Ул арала эслек әҙерләйбеҙ.
400 г ҡаймаҡҡа (20 процентлы) 4 йомортҡа, 120 г шәкәр, бер ҡап ванилин һәм 2 – 3 ҡалаҡ крахмал ҡушып, миксер менән яҡшылап туҡырға. Әгәр артыҡ шыйыҡ булһа, тағы ла крахмал өҫтәргә мөмкин.
Ҡамырҙы йәйеп, табаға һа­лыр­ға. Ситтәре бейегерәк бул­һын. Эслекте ҡойоп, ти­геҙләргә лә, 180 градус эҫелек­тәге мейестә 45 минут бешерергә.

Һарымһаҡлы картуф

Был ризыҡты яңы өлгөргән (ваҡ булһа ла ярай) картуф менән әҙерләһәң, тәмле була. Уны йыуып, ҡабығы менән бешерергә. Һыуын түгеп, һы­уы­тырға ла, таҙартып, йоҡа телемдәргә турарға. 
2 ҡалаҡ зәйтүн йәки үҫемлек майы менән 50 г аҡ майҙы  (1 кг картуф иҫәбенә) бергә бутап, утҡа ҡуйырға. Уға ваҡлап ту­ралған 8 бүлкәт һарымһаҡты һалып, бер аҙ ҡыҙҙырырға. Әсе­не яратыу­сылар ваҡлап туралған   әсе борос ҡуша ала. Уртаса утта картуфтың ике яғын да ҡыҙ­ҙырырға. Өҫтөнә ваҡ итеп туралған йәшел тәм­ләткестәр, самалап тоҙ, төйөлгән ҡара борос менән мускат сәт­ләүеге, 1 балғалаҡ шәкәр ҡушыл­ған 50 мл лимон һуты һибеп, табынға бирергә.

Көртмәле (черника)
менән компот

Көртмәлене йыуып, һыуын һарҡытҡас, 3 литрлы банкаға һалырға. Ҡайнар һыу ҡойоп, өҫтөн ҡаплап, бер аҙ һыуынғансы (30 минут тирәһе) ултыртырға.
Һыуын кәстрүлгә һарҡытып алғас (емеш банкала ҡал­һын), 300 г шәкәр өҫтәп, тағы ла ҡайнатырға. Сиропты ҡабат банка­ларға ҡойорға һәм һы­уытырға. Әгәр компотты ҡыш­ҡылыҡҡа әҙерләйһегеҙ икән, банкаларҙы мотлаҡ стерилләргә һәм тимер ҡапҡас менән ябырға кәрәк.

Гөлнур ҠЫУАТОВА әҙерләне.

Автор:Гульнур Куватова
Читайте нас в