Таныш булығыҙ: «Юлдаш»тар: Клара ШӘРИПОВА

Тыуған ерем: Баймаҡ районының Өмөтбай ауылы.

Белемем буйынса мин: филолог, башҡорт теле һәм әҙәбиәте, рус теле һәм әҙәбиәте уҡытыусыһы.

Радиола нисек эш башланым: 2002 йылдың сентябрь айында  «Башҡор­тостан радиоһы»ның «Ижад» әҙәби берекмәһендә эш башланым.

Эшемдә иң оҡшағаны: берҙәм, ихлас, татыу коллектив булыуы.

Хәтерҙә ҡалған ваҡиға, герой: һәр тапшырыу, һәр герой һинең күңел түрен дә үҙ урынын биләй.  «Мәғариф» темаһын яҡтыртҡан саҡта Белорет ҡалаһында Яныбай Хамматов исе­мендәге башҡорт гимназияһында булырға тура килде.  Беҙҙе ҙур бер оркестр менән ҡаршы алыуҙары һис оноторлоҡ түгел. 

Башҡортостандың  һәр районын тиерлек урап сыҡтыҡ. Яҙмаларҙы алып ҡайтҡас та, монтажлап, эфирға сығар­ғансы шул геройҙарың менән йәшәйһең. Ҡайһы берәүҙәре яҡын кешеңә әүерелә.  Һуңғы йылдарҙа социаль мәсьәләләргә  бәйле темаларға күберәк иғтибар бүлергә тырышам. Мөмкинлектәре сикле булып та, тормошҡа-йәшәйешкә ынтылыштарын юғалтмаған  Саҡмағош егете, спортсы, блогер Рөстәм Нәбиев, Әбйәлил районы Йәнекәй ауылынан бер туған Ҡунаҡҡоловтар тураһындағы тапшырыу радио тыңлаусылар араһында ҙур резонанс тыуҙырҙы.

Рәхмәтлемен: яҙмышыма, матур тәрбиә биргәне өсөн ата-әсәйемә, улым Айнурға.

Эшкә бәйле ҡурҡыныс төш:  бер- ике йыл хаттар бүлегендә зшләп алырға тура килде. Шул саҡта хаттарға бәйле мажаралы төштәрҙе йыш күрә инем.

Яратҡан йырым: күңелгә ятҡан, мәғәнәле йырҙар.

Китабым: В.Пикуль, “Нечистая сила”,  шиғри йыйынтыҡтар,

Фильм: “Судьба человека”, “Вокзал для двоих”, “С легким паром” ...

Эштән арып киткән саҡтарҙа: йәйгеһен баҡсала рәхәтләнеп  ерҙә соҡонам, мунса инеп ял итәм, ҡышын саңғыла йөрөүҙе хуп күрәм. Форсаты сыҡҡан һайын тыуған Башҡортостан буйлап сәйәхәт итеп, үҙемә илһам алам.

Ғорурланған һуңғы ҡаҙанышым: өс йәшлек ейәнсәрем Мәликәнең, Мәскәүҙә йәшәһә лә, таҙа итеп башҡортса һөйләшеүе, рухлы бала булып үҫеүе – минең өсөн ғорурлыҡ.