Зәңгәр күк йөҙөн иңләй ҡыйыуҙар

Наҙгөл тауҙар ҡосағында урынлашҡан, хозур тәбиғәтле Белорет районының Мәхмүт ауылынан. Ул бәләкәйҙән аҡыллы, тәртипле, ярҙамсыл бала булып үҫә: уҡыуҙа ла һынатмай, йыр-моңға маһир була. Уңған ҡыҙ Башҡорт дәүләт аграр университетының урман хужалығы факультетын ҡыҙыл дипломға тамамлаған. «Студент йылдарында үҙемде төрлө яҡтан һынап ҡарарға тырыштым. Бер аҙ уҡығас та уҡытыусылар мине яуаплы вазифаға – уҡыу-тәрбиә комиссияһы буйынса рәйес итеп тәғәйенләне. Насар уҡыған студенттарҙың тәртибен төҙәтеү буйынса аңлатыу эштәре алып барҙым, университеттан ебәреү, имтихандарҙы ҡайтанан тапшырыу документтарын әҙерләү миңә йөкмәтелә ине», – тип һөйләй Наҙгөл.

Ҡыҙ, дәрестәрҙән, тынғыһыҙ йәмәғәт эштәренән тыш, сәйәхәт итергә, төрлө тел өйрәнергә лә өлгөрә. Аҙаҡҡы курста уҡығанда көтмәгәндә, яҡындарын аптыратып, Америка Ҡушма Штаттарына эшкә сығып китә. «Бер мәл университетта «Ворк анд травэл» («Work and travel») программаһы буйынса студенттарҙы Америкаға эшкә йыйыуҙары хаҡында белеп ҡалдым. Сәйәхәт итеү тураһында күптән хыяллана инем. Яҡындарым фатиха биргәйне, күңелемдәге осҡондар тағы ла нығыраҡ дөрләргә тотондо. Дәрестәрҙән һуң инглиз теле мәктәбенә йөрөй башланым, телефоныма ҡушымталар ҡуйып алдым, сериалдар ҡарарға тотондом. Шул рәүешле бер-ике айҙа сит телде ярайһы ғына үҙләштерҙем һәм Америкаға остом», – ти Наҙгөл. Ауыр физик хеҙмәткә өйрәнеп үҫкән ауыл ҡыҙына ундағы эш бер ни тормай. Ул йәй буйына мул итеп аҡса таба һәм артабан сәйәхәткә сығып китә. Америка ҡалаларын, Берләшкән Ғәрәп Әмирлектәрен, Һиндостанды барып күрә.

Әүҙем тормош алып барған, сәйәхәтте үҙ иткән ҡыҙ бортпроводник булырға ҡарар итә. «Америкала эшләп ҡайтҡас, артабан сәйәхәт иткем килде. Үҙемде төрлө өлкәлә һынап ҡарағандан һуң, авиакомпанияларға резюме ебәрә башланым. Яҙмышыма рәхмәтлемен, «Аэрофлот» ойошмаһының барлыҡ һынауын уңышлы үтеп, шунда бортпроводник булып эшкә урынлаша алдым».
Бөгөн Наҙгөл ике йылға яҡын эшләү дәүерендә Рәсәйҙең барлыҡ мөйөшөндә булған, бик күп ил күргән. Унан ком панияға эшкә ҡабул итеү нескәлектәре тураһында һораштым. «Тәүҙә ойошма етәкселеге әңгәмәгә саҡыра. Әгәр уны уңышлы үтһәң, артабан сәләмәтлегеңде ентекле итеп тикшерәләр. Талаптар бик ҡаты, әйтәйек, ҡан баҫымың аҙ ғына юғары йә гемоглобиның төшөп киткән икән, һине алмаясаҡтар», – ти Наҙгөл. Ҡыҙ тәүге осоуын бөгөнгөләй хәтерләй. бик тулҡынландырғыс, ҡулдан бөтә нәмә төшөп барған кеүек булды, ти ул. Ысынлап та, самолетта осоу өсөн дә батырлыҡ кәрәк, етмәһә, һуңғы йылдарҙа күктә аяныслы хәлдәр ҙә йыш булғылай. Наҙгөлгә эшендә әсәһе терәк булып тора. Ул кинйә ҡыҙының һәр уңышына ҡыуанып, ҡеүәтләп тора. «Әсәйем, ике ағайым һәм апайым минең бортпроводник булыу теләгемә ҡаршы килмәне, төрлө илгә сәйәхәт итеүем яҡындарыма бик оҡшай. Уларға төрлө фотоһүрәт, видеояҙма ебәреп торам. Шулай ҙа барыбыҙ ҙа беләбеҙ, аяныслы осраҡтар күп теркәлә, Аллам һаҡлаһын. Интернетта йә телевизорҙа самолет ҡолауын күреп ҡалһалар, шунда уҡ миңә шылтыраталар», – ти Наҙгөл.
Стюардессалар самолетта табип та, янғын һүндереүсе лә, ҡотҡарыусы ла. Наҙгөлгә лә бер тапҡыр кеше ҡотҡарырға тура килгән. Был хәл Мәскәүҙә автобуста булған. Бер ҡыҙҙың эпилепсия өйәнәге башланғас, яҡташыбыҙ юғалып ҡалмаған, шунда уҡ ярҙам итергә тотонған. Уға беренсе ярҙамды күрһәтеп, табиптар ҡулына тапшырған.

Уңайһыҙыраҡ тойолһа ла, Наҙгөлдән күпме аҡса эшләүе хаҡында ла һорай ҡуйҙым. Уның әйтеүенсә, коронавирус пандемияһына бәйле, эш хаҡы бер аҙ кәмегән. «Беҙҙең компанияла был – йәшерен мәғлүмәт, уны таратыу тыйыла. Хатта интернет селтәрҙәренә эш костюмында төшкән фотоны һалырға рөхсәт итмәйҙәр. Шул уҡ ваҡытта башҡа ойошмаларҙа бындай сикләү юҡ».
Кинофильмдарҙа самолетта осҡан егеттәр йыш ҡына стюардессаларҙы күҙләй, уларҙы осрашыуға саҡыра. Наҙгөлгә ошо хаҡта һорау бирҙем. «Егеттәр самолетта танышырға тотонһа, әҙәпле генә итеп кире ҡағырға тырышабыҙ. Аэропорттан сыҡҡанды йыбанмай көтөп торғандары булды, стаканға телефон һандарын яҙалар йә талон номерҙарын ҡалдырып китәләр. Минең яратҡан егетем булғас, уларҙы һаҡламайым», – тип көлә Наҙгөл.

Маҡсаттары хаҡында һорашҡас: «Был һөнәр ни тиклем ҡыҙыҡлы, яҡшы булмаһын, бортпроводник булып эшләүем ваҡытлыса ғына. Минең өсөн уның кире яғы – шәхси тормошҡа бөтөнләй ваҡыт ҡалмай тиерлек. Киләсәктә үҙемдең уҡып сыҡҡан һөнәрем буйынса үҫергә теләр инем. 2018 йылда тағы бер хыялымды тормошҡа ашырҙым – Байкал күленә барып ҡайттым. Артабан ундағы ҡурсаулыҡтарҙа йә Камчатка ярымутрауында эшләр инем», – ти Наҙгөл.

Ошондай ирек һөйгән, үҙ маҡсаттарына ирешкән тиҫтерҙәрем менән аралашыу – үҙе бер ғүмер. Наҙгөлдөң дә һөйләгәндәре – тик изгелек, рухи үҫеш хаҡында. «Сәйәхәт итеү ғүмерҙе оҙайта, аң даирәһен киңәйтә. Шуға күрә сәйәхәт итегеҙ. Һәм бер ваҡытта ла икеләнмәгеҙ, һәр кешенең фекеренә ҡолаҡ һалып бармағыҙ, шунда ғына хыялдарығыҙға ирешәсәкһегеҙ!» – тип тиҫтерҙәренә теләктәрен дә еткерҙе замандашым.

Зәңгәр күк йөҙөн иңләгән ҡыйыу ҡыҙға уңыштар юлдаш булыуын теләп ҡалам.

Фото: Т. Аманов.