Тоҙлокүлгә күрше өлкәләрҙән дә киләләр

Күлдең дауалау көсөн ата-ба­баларыбыҙ борон-борондан белгән, дауаланған. Оло йәштәге инәйҙәр ҙә шуны дәлилләй. Ҡарап тороуға  күлгә бик оҡшамаған, күберәк батҡаҡ быуаны хәтерләтә. 
Тоҙлокүлдең исеме есеменә тап килә. Уның һыуы бик тоҙло. Сос­тавындағы төп элемент – көкөртлө водород, Ессентуки17 минераль һыуына оҡшаш. Ә күлдең диаметры –  20 метр, тәрәнлеге –  1 метр.
Тоҙлокүлгә ингән кешенең тәнен ҡара батҡаҡ ялмап ала. Унан сыҡ­ҡас, эргәһендә сайынырға ябай һыу сығанағы бар. Душта ҡойонорға ла мөм­кин. Теләгәндәр мунса инә ала.
Тирә-яғында ҡамыш йәйрәп ултыра. Беҙҙең Яҡуттың, Тоҙло­күлдең матурлығын данлап, ауыл­дашыбыҙ Сибәғәт ағай Рахманғолов бик матур, үҙенсәлекле йыр яҙған. Унда:
«Юшатырың балыҡҡа бай,
Тоҙло күлең дауалай.
Тырыш хеҙмәт кешеләрең
Тыуған ерҙәрен данлай», – тигән юлдар ҙа бар.
Тоҙлокүлде йыл әйләнәһенә ата­лы-уллы Рәжәп Рамаҙан улы  һәм Рәмил Рәжәп улы Юлбарисовтар ҡарай. Тирә-яғын тәртиптә тоталар, ятҡылығын таҙартып торалар, тал­пандарға ҡаршы ағыу һиптерәләр. Әйткәндәй, Рәжәп Рамаҙан улы – Башҡортостандың атҡаҙанған табибы, Салауат Юлаев ордены кавалеры. 
Тоҙлокүлдең күбеһенсә терәү-хәрәкәт аппараты сирҙәре менән ыҙа сиккәндәргә файҙаһы ныҡ ҙур. Артыҡ кәүҙә ауырлығы, тире ауырыуы менән йонсоғандарға, түлһеҙ интеккән апайҙарға ла батҡаҡтың дауаһы килешә икән!
Тоҙлокүл – беҙҙең ауылыбыҙҙың, районыбыҙҙың даны, матурлығы. Ул беҙгә Хоҙай тарафынан ебә­релгән ҙур бүләк! Тоҙлокүл менән ысын мәғәнәһендә ғорурланабыҙ! Киләсәк быуынға еткерер өсөн, әйҙәгеҙ, уны һаҡлайыҡ!

Фаягөл ҠУНАҠБАЕВА,
Стәрлетамаҡ медицина колледжының Күмертауҙағы филиалы студенты.