Марсель Ҡотоев «Көнсығыш баҙары»ның финалында

Билдәле йырсы, Хөсәйен Әхмәтов исемендәге Башҡорт дәүләт филармонияһы солисы Марсель ҡотоев эстрада йырсыларының «Көнсығыш баҙары – 2010» VI халыҡ-ара телевизион конкурсында уңышлы сығыш яһаны. Йырсы финалға үтте һәм гала-концертта сығыш яһау өсөн һайлап алынды.
Быйыл фестиваль ҡырымда үтте. Унда ҡаҙағстан, Үзбәкстан, Татарстан, ҡырғыҙстан, Грузия, Израиль, Индонезия, Ирландия, Латвия, Литва һәм башҡа илдәр­ҙең вәкилдәре ҡатнашты.
Йола буйынса ярыш ике турҙа ойошторолдо. Беренсе көндә эстрада эшкәртелеүендә – фольклор йырын, икенсеһендә теләк буйынса бер эстрада йырын башҡарырға кәрәк ине. Марсель ҡотоев яҡшы сығыш яһап, финалсылар иҫәбенә инде.
Йомғаҡлау концертында жюри гран-приға лайыҡлы кешене һайлай алманы, һөҙөмтәлә призлы урындар ошондай тәртиптә бүленде. Беренсе урынды «Бельбек» (ҡырым, «Урал моңо – 2010» конкурсында гран-при алды) һәм «Кеш You» (ҡаҙағстан) төркөмдәре яуланы, икенсе урынды Үзбәкстан һәм Украина вәкилдәре бүлеште, Израиль һәм Грузия башҡарыусылары өсөнсө урынды алды. Марсель ҡотоев абруйлы конкурстың финалсы дипломы менән наградланды.