«Дәрүиш рухы +» концертында күптән лайыҡ ҡаҙаныштар эйәләренә тапшырылды

Был мәртәбәле исемдәрҙе музыканттарыбыҙға «Дәрүиш рухы +» башҡорт рок-концерты барышында Башҡортостан Республикаһы Хөкүмәте Премьер-министрының беренсе урынбаҫары Урал Таһир улы Килсенбаев тапшырҙы!

Рок-концертта башҡорт рок-музыканттарының сығышын рок-музыка һөйөүселәре менән бергә Башҡортостан Республикаһы башлығы Радий Фәрит улы Хәбиров һәм Башҡортостан Республикаһының Мәҙәниәт министры Әминә Ивний ҡыҙы Шәфиҡова ҡараны.

Сара барышында шулай уҡ Башҡортостан Республикаһы Хөкүмәте Премьер-министрының беренсе урынбаҫары Урал Таһир улы Килсенбаев рок-концертҡа йыйылған тамашасыларға мөрәжәғәтендә:

- ... Икенсенән, ошо ҙур, мәртәбәле өр-яңы һарайҙа Башҡортостан Республикаһының башлығы Радий Фәрит улы Хәбировтың “Ҡош юлы” буйынса эшләнгән беренсе концерт юҡтан ғына беҙҙең башҡорт рок-төркөмдәренә бағышланмаған. Ул осраҡлы түгел, сөнки бөгөн һеҙҙең менән бергә ошонда хәл итергә тейешбеҙ. Ошо сараны, ошо фестивалде йыл да үткәрергә беҙ әҙерме?! Тауыш бирәйек! Һәм, өсөнсөнән, был күңел асыу сараһы ғына түгел. Был – рух көсөнөң, башҡорт рогы көсөнөң, беҙҙең берҙәмлегебеҙ көсөнөң ҙур, матур сараһы. Һәм, әлбиттә, бөгөн бөтәбеҙҙе лә Дим Ҡоләхмәтов, Ғәзинур Биктимеров, Ирек Атановтарҙың рухтары тағы ла бергә йыйҙы. Йыйып ҡына ҡалманы, улар беҙҙең рухты һаман да тәрбиәләй. Бөгөн ошо сәхнәнән, һеҙҙең алда иң халыҡсан рок артистарының рухтарын иҫләп, Радий Фәрит улының ҡарары менән ғәҙелһеҙлекте бөтөрөргә рөхсәт итегеҙ. – тине.

Сығышының һөҙөмтәһендә Урал Килсенбаев БР башлығы Радий Хәбировтың Дим Ҡоләхмәтов (“Дәрүиш-хан” төркөмө), Ирек Атанов һәм Ғәзинур Биктимеровҡа (икеһе лә “РУХ” төркөмө) үлгәндән һуң Башҡортостандың халыҡ артисы исеме биреү тураһында Указға ҡул ҡуйыуы хаҡында иғлан итте.