Бөтә яңылыҡтар
Иман
11 Сентябрь 2022, 15:00

Өйләнмәгән уҡыһа — өйләнер, ҡурҡҡан кеше ҡурҡыуынан ҡотолор, ауырыу — шифа табыр

– Үлгәс, миңә «Йәсин» уҡырһың әле, – ти миңә бер өлкән апай. Баҡһаң, ул да, башҡалар кеүек, был сүрә мәрхүмдәр өсөн генә уҡыла, тип уйлай икән. – Уны үҙеңдең һаулығың өсөн көн һайын уҡыһаң да була, уның һәр аяты ла файҙалы, – тигәс, таныш апай аптырап китте.

Өйләнмәгән уҡыһа — өйләнер, ҡурҡҡан кеше ҡурҡыуынан ҡотолор, ауырыу — шифа табыр
Өйләнмәгән уҡыһа — өйләнер, ҡурҡҡан кеше ҡурҡыуынан ҡотолор, ауырыу — шифа табыр

"Берәй бәндә төндә «Йәсин» сүрәһен Аллаһтың ризалығына ирешәйем тип уҡыһа, Аллаһ Тәғәлә ул кешене шул төндө ғәфү итәлер". Был бихисап оло сүрәнең башҡа фазыйләттәре тураһында хәҙрәти Ғәли радыйаллаһү ғәнһе тарафынан тапшырылған хәҙистән белә алабыҙ:

   "Рәсүлуллаһ салләллаһү ғәләйһиссәлләм әйтте: «Кем дә булһа „Йәсин“ уҡыуҙы тыңлаһа, нәҡ Аллаһ Тәғәлә юлында егерме алтын аҡса таратҡан һымаҡ; кем уны уҡыһа, нәҡ ике тиҫтә теләгәненә ирешкән кеүек булыр; кем уны һауытҡа шафран менән яҙып, шул һауыттың сайҡаған һыуын эсһә, уның ашҡаҙанына мең дауа, мең нур, мең хаҡлыҡ, мең мәрхәмәт мең бәрәкәт, һәм ризыҡ керер, һәр ауырыу һәм яуызлыҡ сығып китәр». Аллаһтың Рәсүле салләллаһү ғәләйһиссәлләм әйтеүе буйынса, «Йәсин» сүрәһе Муса ғәләйһис-сәләмгә ингән Тәүрәт китабында ла бар икән. Унда ул «Әл- Мугаммә» тип аталған булған. Ул — уҡыусы бәндәгә донъя-әхирәт, хәйер-сәғәҙәтләрен насыйп итеүгә сәбәп булыусы сүрә. Был сүрә — уҡыусыһын донъя һәм әхирәт афәттәренән ҡотҡарыусы булған. Шуға күрә Исраил улдары араһында әлеге сүрәне «хәжәттәрҙе үтәүсе сүрә» тип атай торған булғандар. Сөнки был сүрәне ихлас күңелдән уҡыусыларҙың хәжәттәре үтәлгән.

Рәсүл Әкрам ғәләйһис-сәләм: — «Йәсин» — Ҡөрьәндең йөрәге. Уны бер мәртәбә уҡып сығыу — Ҡөръәнде ун мәртәбә уҡып сығыу кеүектер. Кистәрен «Йәсин»-де уҡыған— иртәһенә ҡәҙәр иләһи мәғфирәткә, йәғни Аллаһы Тәғәлә ярлыҡауына ирешер. Берҙән-бер булған Аллаһы Тәғәлә ризалығы өсөн был сүрәне уҡыусы кешенең элекке хатталары ғәфү ителер. Үлем хәлендә ятҡан кеше янында был сүрәне уҡыһағыҙ, сүрәнең һәр хәрефе һайын ун фәрештә ҡаршына килеп баҫып, йән биреүсе өсөн мәрхәмәт теләп торорҙар һәм мәйетте күмгән ваҡытта, ҡәбер янында булып, доғала булырҙар, йәннәт шәрбәтен эсерерҙәр, һәм вафат булған кеше, йәннәткә ингәнсә ҡәҙәр, һыуһау тоймаҫ. Был сүрәне уҡыусыға шәфәғәтсе (Ҡиәмәт көнөндә кемделер яҡлар) булыу мөмкинлеге бирелер, тыңлаусы иһә – ғәфү ителер, — тигән (Кәшшәф тәфсире, 3-295). 
     «Йәсин» сүрәһе — Раббыбыҙҙың бер хазинаһылыр. «Йәсин» сүрәһен 7, 21 йәки 41 мәртәбә уҡыған кеше үәсүәсә, шикләнеү-шөбһәләнеүҙән ҡотолор, Аллаһы Тәғәлә уға донъя-ахирәт бәхеттәрен насип итәр. Мохтаж кеше хужа-түрәләр янына был сүрәне 7, 21 йәки 41 мәртәбә уҡыған хәлдә керһә, хәжәте үтәлер, иншаАллаһ.

«Кем дә кем йома көндө атаһы менән әсәһе йәки быларҙың береһе ҡәбере янына барып, баш осонда «Йәсин» сүрәһен уҡыһа, һәр хәрефе һанынса ата-әсәһенә мәғфирәт – ярлыҡау булыр», — тигән хәҙис-шәрифтә.
     «Ҡәберстанға инеп, кем дә булһа «Йәсин» сүрәһен уҡыһа, ошо көндән ҡәберҙә булыусыларҙың ғазабы еңеләйер, уҡыусыға иһә «Йәсин»дәге хәрефтәр һанынса сауабы бирелер», — тигән Мөхәммәд ғәләйһис-сәләм.
     Пәйғәмбәр саллаллаһү ғәләйһи үәс сәлләм: «Һәр кистә «Йәсин» сүрәһен уҡыусы кеше, һис шикһеҙ, шәһит булараҡ үләр, Аллаһы Тәғәлә ризалығына өмөт итеп, кистәрен «Йәсин» уҡыусы кеше Аллаһы тәғәлә тарафынан ғәфү ителер, «Йәсин» сүрәһен кистәрен уҡыусы кеше үҙе Ҡөръәнде бер юлы ете мәртәбә уҡып сыҡҡан кеүек әжер-сауаптарға эйә булыр,– тигән.
     «Йәсин» сүрәһен үлем түшәгендә ятыусылар өсөн уҡыу тураһында
     — Үлем хәлендә ятыусы кеше янында «Йасин» сүрәһен уҡығыҙ (Мәғҡыйл ибн Йәсәр риүәйәте).
     — «Йәсин» сүрәһен әжәле яҡынлашҡан кеше янында уҡығыҙ! Аллаһы Тәғәлә уның йән биреүен еңеләйтер (Дәйләми риүәйәте).
     — Үлеме яҡынлашҡан кешенең баш осонда даими «Йәсин» сүрәһе уҡылһа, Аллаһы Тәғәлә уға еңеллек бирер! — тигән Мөхәммәд ғәләйһис-сәләм (Әд-Дәрҙә риүәйәте). Бынан тыш, ул хәбәр иткәнсә, Аллаһы Тәғәлә әжәле яҡынлашҡан кеше янында «Йәсин»дең уҡылған һәр хәрефе һайын унар фәрештә индерер. «Йәсин» сүрәһендә өс мең хәреф барҙыр. Был фәрештәләр, саф-саф теҙелеп, әжәле яҡынлашҡан кеше өсөн доға-истиғфәр ҡылырҙар, тип әйтелә. Үлем тәменән иҫергән кеше, Ридван йәннәтендәге шарабты ауыҙ итмәйсә, хатта Ғазраил ғәләйһис-сәләм фәрештәгә йәнен дә бирмәҫ, тип әйтелә. Был хәбәрҙе Пәйғәмбәребеҙ ғәләйһис-сәләмдән Әнәс хәҙрәттәре тапшыра (Дәрими йыйынтығы).
  Егерме бәрәкәт сүрәһе

     Рәсүл Әкрам саллаллаһү ғәләйһи үәс сәлләм: «Әй, Ғәли! «Йәсин» сүрәһен дауамлы хәлдә уҡып тор! Хаҡлыҡта, унда егерме төрлө бәрәкәт барҙыр! Уны ас кеше уҡыһа — туйыр, һыуһаған кеше уҡыһа — һыуһауы баҫылыр, яланғас уҡыһа — кейенә алыр, өйләнмәгән уҡыһа — өйләнер, ҡурҡҡан кеше ҡурҡыуынан ҡотолор, ауырыу — шифа табыр, зиндандағы кеше иреккә сығыр, мосафир уҡыһа — сәфәрендә ярҙамға ирешер; юғалған әйбер табылыр; хәсрәтле кеше уҡыһа — хәсрәтенән арыныр...» — тигән. Һис шикһеҙ, инанып, ышанып, шик тотмайынса уҡыған кеше генә ниәтенә, күңеленә ҡарата мораҙына ирешер.

     Йома кистәрендә «Йәсин» сүрәһен уҡыу тураһында
     Пәйғәмбәребеҙ әйткән:
     — Йома кистәрендә «Йәсин» сүрәһен уҡыусы кеше иртәнге сәғәттәренә тиклем иләһи ярлыҡауға ирешкән хәлдә ҡалыр.
     — Йома кисендә ике рәкәғәт намаҙ уҡып, беренсе рәҡәғәтендә «Әлхәм»дән һуң, «Йәсин», икенсеһендә «Әлхәм»дән һуң «Тәбәрәк» сүрәләрен уҡыусы кешегә уҡығанының һәр бер хәрефе һайын меңәр нур бирелер. Ул нур Ҡиәмәт көнөнә ҡәҙәр балҡыр. Ғәмәл дәфтәрҙәренә лә яҙылыр. Йәһәннәмдән ҡотолоуға сәбәптәрҙән булыр.

 

Фото: Т. АМАНОВ.

 

Автор:Гөлназ Шәйхетдинова
Читайте нас: