Камилла САКАЕВА

19 йәшлек Камилла гүзәл баш ҡалабыҙҙа тыуып үҫеүе менән ғорурлана. Әле ул ме­дицина колледжында иң яуаплы һөнәрҙәрҙең береһе – акушерлыҡҡа уҡый. “Бәлә­кәйҙән үк кешеләргә файҙалы булғым килде. Яңы кеше тыуған мәлдә эргәлә булыу, әсәгә ярҙам итеүҙән дә ғә­жәйеп эш юҡтыр”, – ти ҡыҙ. 
Белем алыуҙан тыш, Ка­милла төркөмдә староста булырға ла, ятаҡта санпост йөкләмәләрен үтәргә лә өл­гөрә. Уҡырға ныҡ ярата: медицина китаптарын ғына түгел, сит ил нәфис әҙәбиәтен, психологияны үҙ итә. Тирә-йүндең хозурлығын фотоға төшөрөргә ярата. 
“Өфө миңә барыһын да бирҙе. Мин дә киләсәктә уның халҡына үҙемдең энергиямды, белемемде һәм һөйөүемде бирәсәкмен”, – ти Камилла.

Л. РАИЛОВА.