Арина ҒАФАРОВА

– 18 йәштәмен. Өфөлә тыуһам да, мәктәп йылдарын Благовар ра­йонының Иҫке Күсәрбай ауылында үткәрҙем. Унда тынлыҡты һәм тәбиғәттең матур­лығын ҡәҙерләргә өйрән­дем. Хәҙер мин Урал поли­техник колледжында юриспру­денция йүнәлеше буйынса икенсе курста уҡыйым. 
Йондоҙнамәм буйынса мин  Арыҫлан, был бөтә сағыу һәм ғәҙәти булмаған нәмәгә һөйөүемде аң­латалыр. Хай­уандарҙы бик ныҡ яратам, бигерәк тә эттәрҙе, улар – минең өсөн тоғ­ролоҡ һәм фи­ҙакәрлек символы. Экзотик йәнлектәр ҙә ҡыҙыҡ­һын­дыра. Бер нисә ай элек ахатина ҡусҡарҙарын  алдым. Быға шатлығым сикһеҙ! Улар шул тиклем тыныс, күҙәтеүе бик ҡыҙыҡ.
Уҡыуҙан тыш мин ҡул эштәре менән шөғөлләнәм – атлас таҫ­ма­ларҙан сәскә гөлләмәләре яһа­йым. Ошо ижади процесс ба­рышында илһамландырғыс се­риал­дар ҙа ҡа­рарға өлгөрәм. Гөллә­мә­ләрҙе ал­дан һорау бу­йынса ла яһайым, был минең өсөн аҙ булһа ла килем. 
Элек хайуандарға ярҙам итер өсөн ветеринар булырға хыяллана инем, әммә хәҙер маҡ­сатым бер аҙ үҙгәрҙе. иң мөһиме – яҡындарымдың сә­ләмәтлеге һәм именлеге. Килә­сәктә сәйәхәт итергә – донъяны күрергә һәм яңы мәҙә­ниәттәрҙе өйрәнергә теләйем.