Бар яҡтан өлгөлө ҡыҙ ул Алһыу Шәймәрҙәнова. Әле Өфө ҡалаһындағы 108-се мәктәптең X “А” синыфында белем ала. Бәләкәйҙән үк яҡшы билдәләргә генә өлгәшә, бигерәк тә математика, геометрия, тарих, физик тәрбиә, инглиз теле дәрестәрен көтөп ала. Ошо фәндәрҙән олимпиадаларҙа ҡатнашып тора. Туғыҙынсыны ҡыҙыл аттестатҡа тамамлауы Алһыуҙың ниндәй маҡсатлы һәм тырыш булыуын тағы берҙе иҫбат итә.
Ҡыҙҙың иң яратҡан шөғөлө – бейеү. Екатерина Андреевна Гайдук етәкләгән “Башмачок” өлгөлө балалар бейеү ансамбленең ҙурҙар төркөмө солисы ул. Өсөнсө синыфтан алып шөғөлләнә. Бейеүселәр бер нисә йыл эсендә илебеҙҙе урап сыҡҡан. Былтыр, мәҫәлән, Ставрополь ҡалаһында үткән мәртәбәле бәйгелә – “Мәктәп яҙы” Бөтә Рәсәй фестивалендә Башҡортостан Республикаһы исеменән сығыш яһап, I урын яуланылар.
Алһыуҙың әсәһе Гөлназ Альберт ҡыҙы һәм атаһы Ирек Хәлим улы ҡыҙҙары менән бик ғорурлана. Туғандары Алмас менән Әлиә лә апаларынан ҡалышмай – шулай уҡ бейеү түңәрәгенә йөрөй. Алһыу киләсәктә хореограф булмаҡсы. Уңыштар!
Лилиә МӘҮЛИТОВА.