+24 °С
Облачно
"Йәшлек" гүзәле
18 Марта 2023, 02:00
Фирүзә МӨХӘМӘТЙӘНОВА
– Баймаҡ районының Ҡыуат ауылында тыуып үҫтем. Мәктәп йылдарында һәр конкурста әүҙем ҡатнаштым. Шиғыр һөйләү, халыҡ бейеүҙәре бәйгеләрен, олимпиадаларҙы, спорт ярыштарын бигерәк ярата торғайным.
Бала саҡтан өйҙә әсәйем менән аш-һыу бүлмәһендә тәмлекәстәр бешерергә ярата инем. Шуға күрә 11-се синыфтан һуң Башҡорт дәүләт аграр университетына уҡырға инергә маҡсат ҡуйҙым. Әлеге көндә мин БДАУ-ҙың аҙыҡ-түлек технологиялары факультетында 4-се курста уҡып йөрөйөм. Университет тормошонда ла әүҙем ҡатнашам. 1 – 2-се курстарҙа баскетбол, лапта, йөҙөү, дартс кеүек спорт төрҙәрендә призлы урындар яуланым, ә 3 – 4-се курстарҙа күберәк фән яғынан әүҙемлек күрһәтәм. Ит, һөт технологиялары һәм химия кафедраһында сыр әҙерләү буйынса яңы технология проектын әҙерләп, еңеү яуланым. Хәҙерге ваҡытта шул проект буйынса эш алып барам.
Буш ваҡытта аш-һыу бүлмәһендә тәмлекәстәр бешерәм, китап, шиғырҙар уҡыйым, яңы инновацион проекттар әҙерләйем.
Маҡсатым – киләсәктә илгә файҙалы кеше булыу, сәйәхәт итеү, үҙ эшемде асыу. Мөмкинлеге сикләнгән балаларға ярҙам итергә уйым бар, шуға ла реабилитация үҙәге асыу – иң ҙур хыялым.
