Әле һүҙебеҙ Бөрйән районының Байназар ауылы ҡыҙы Зәлиә АЛТЫНБАЕВА тураһында. Ул М. Аҡмулла исемендәге Башҡорт дәүләт педагогия университетының башҡорт филологияһы факультетында белем ала.
Зәлиә – уҡыу алдынғыһы, яҡшы уҡырға ла, университетта уҙған һәр сарала ҡатнашырға ла өлгөрә. Шиғырҙар ижад итә, тәбиғәттең гүзәл мәлдәрен фотоға төшөрөргә әүәҫ. Ә иң ҙур мауығыуы – халыҡ бейеүҙәре.
– Ҡазанда үткән «Милли ҡаҙаныш» Волга буйы федераль округы фестивале еңеүсеһемен, Барнаулда төбәк-ара конкурста 2-се урын яуланым. Факультеттың «Ете ырыу» ансамбле составында илдең төрлө ҡалаһы буйлап сәйәхәт итеү, башҡорт бейеүҙәрен танытыу бәхете тейҙе, – ти өлгөр ҡыҙ.
Зәлиәнең хыял-ниәттәре изге – уҡыу йортон уңышлы тамамлап, тыуған республикаһына лайыҡлы хеҙмәт итеү, ата-әсәһенә терәк-таяныс булыу.